謝霆鋒穿搭品味被歸功王菲　T恤價格震驚網友

男神謝霆鋒出道至今顏值依然處於巔峰，Man力爆燈嘅佢一舉一動都圈粉無數，不姿整不化妝嘅真性情，更係唔少男女老少心中嘅真男神。而日前現身四川拍攝真人騷《百姓的味道》第二季時，吸引大批群眾圍觀，需要保安列陣開路之餘，身上嘅紫紅色T恤更係意外搶Fo，有別於平時嘅「冷色」風格打扮，更係引嚟唔少網友留言道：「菲的衣品可不是開玩笑哦！」、「阿菲審美好。」、「女朋友會搭啊！」、「衣品確實比年輕時候好，年輕的時候總是亂穿衣。」

此外，更有眼利網友發現謝霆鋒身上嘅T恤竟然係同門師弟陳偉霆嘅潮牌服飾，售價僅139人民幣（約151港幣），親民價錢更令網友驚訝道：「竟然自己也買得起！」而謝霆鋒務實不追求名牌嘅憑度，同樣引嚟唔少網友讚賞有加。

東網網站 : https://on.cc/東網Facebook專頁 : https://www.facebook.com/onccnews/