《擊戰》Ande、波子PO求婚相：未公開拍拖就宣布結婚

由KB、Anson Kong（江𤒹生）及余逸思主持的ViuTV女子打鼓真人騷《擊戰》不單止捧紅幾位素人女鼓手，更成功牽紅線誕生首對節目情侶，參賽者之一Ande及導師波子今日突然在社交平台PO相宣佈結婚，恭喜恭喜！

節目入面Ande被安排做波子組的成員，二人從未對外公開過戀情，亦未有在社交平台透露任何拍拖的蛛絲馬跡，但原來早就偷偷撻著一年。今日Ande同波子分別在社交平台PO出甜蜜合照，相中Ande手抱大紮紅玫瑰及騷出戴上婚戒的手，笑得勁甜，二人留言：「一年只係人生好短嘅一頁，但遇到對的人幾時都係對的時間，兩個人由相識相知到相愛相信，從來都唔容易，多謝你呢一年嚟為我嘅付出同改變，嚟緊一輩子繼續多多指教」，更hashtag「未公開拍拖就宣布結婚」。節目主持之一KB都即時送上祝福：「恭喜晒波子組，sorry係應該叫波子嫂，恭喜晒兩位新人可以進入下一個階段。」