卡塔爾特集｜國鳥獵鷹｜異域狩獵撒手鐧

卡塔爾世界盃日記 Day7

丹麥都係頂唔住麥巴比

美斯又做救世主

今日放棄咗突尼西亞對澳洲嘅直播賽事，出去瓦其夫市集（Souq Waqif）行下。今日係星期六，市集非常熱鬧，由於晚上焦點賽事係輸咗一場嘅阿根廷，球王美斯使唔使執包袱就睇呢鋪，阿根廷球迷空群而出。同日出戰嘅本土勢力沙特不甘示弱，話晒半個主場，球迷大軍出師市場集氣。

喺市集整裝待發嘅仲有墨西哥球迷，佢哋今晚要打大佬。

我哋食完嘢就喺市場睇下傳統貨品，市集有好多小巷，有如迷宮，如果只行大路，就會錯過好多特色小店，而且喺小巷鑽來鑽去更加感受到異域風情，甚至覺得好似去咗《星球大戰》沙漠星球塔圖因嘅外星人市集咁。店舖賣嘅咖啡杯好精緻，當中一套紅格仔花紋，絕對係克羅地亞球迷嘅最佳戰利品。

之後我哋去咗市集旁邊嘅阿拉伯獵鷹市場（Falcon Souq Doha），呢度遊人稀疏，寧靜無比，同市集係兩個世界。除咗獵鷹，呢度仲養咗好多馬。

提到獵鷹，除咗諗起劉德華，呢種猛禽係卡塔爾嘅國鳥，象徵住歷史悠久嘅中東狩獵文化，人類利用鷹隼打獵，講求人鷹合一，一隻精鷹中嘅精英，身價可以達到數十萬美金。啲獵鷹大多數蒙住雙眼，因為一揭眼罩佢哋就會施展攻擊㗎啦。市場裡面有幾隻冇蒙到眼，可能係比較老嘅關係。

獵鷹市場對面有一間露天小餐檔，再向前行就會返到瓦其夫市集，比起市集嘅喧鬧，呢處感覺係偷得浮生半日閒。我哋就坐喺黃昏街角，優哉悠哉咁睇咗波蘭對沙特場波，然後先行返去瓦其夫。

晚飯時間嘅瓦其夫市集萬人空巷，想搵間餐廳搵張枱都唔容易。

其後去咗Fan Festival睇直播，壓軸一場阿根廷本來冇乜起色，但美斯又再單天保至尊，散場時球迷湧落地鐵站，一邊行一邊高呼Messi Messi，聲音響徹月台。

是日賽果：

突尼西亞 0:1 澳洲

波蘭 2:0 沙特阿拉伯

法國 2:1 丹麥

阿根廷 2:0 墨西哥

by港佬

Ig: @kennis.chiangmai

旅遊