卡塔爾世界盃日記 Day2
橙衣兵團旗開得勝
終於等到第一次入場睇世界盃，仲要係捧愛隊荷蘭場，心情超級興奮。出發前做足準備，準備咩呢？當然係化行個打氣妝啦。早兩日喺球迷村超市買咗一盒Fan Box，確係球迷恩物，一盒六件法寶，盛惠59卡塔爾幣，內有一支顏料（一畫即成國旗，唔使逐隻色畫）、一副國旗眼鏡、一支大國旗、一頂毛毛帽、一對pong pong棒同一個口罩，今日實行帶齊去。
港婦漂流：Fan Box開箱。
球賽喺圖瑪瑪（Al Thumama）體育館舉行，對我哋至為方便，因為shuttle bus就喺我哋下榻嘅球迷村外嘅Free Zone地鐵站開出。入場時又遇到阻滯，話說所有門票都電子化，球迷嘅手機都裝咗Hayya App，呢個App係入境同搭公共交通工具必須嘅，而且儲存咗門票，港婦昨日測試都見到佢嘅四場門票，點知今日打開個App發現冇晒紀錄。其實大會到比賽當日先會傳個QR Code過來供入場之用，可能個App更新資料時出咗問題。結果要去票務處搞咗一輪，攞咗張實體飛入場，好彩時間預鬆咗。
到入場安檢，呢個係最麻煩嘅一環，因為標準就係冇標準。相機係准帶入場嘅，但伸縮棍就唔准，港婦帶咗部DJI運動相機，女安檢人員堅持話唔帶得入場。如果有禁止物品係要放低喺存放處，問題係存放處要行好遠（來回至少15分鐘），而且冇理由唔畀人入場影靚相。同佢理論咗一陣，佢叫咗個高級啲嘅人員嚟睇，又話可以帶，吹脹！但原先個女人員搜袋時又見到個小鼓仔，狀如骰盅，又話係違禁品，諷刺嘅係呢件嘢係官方贊助商可口可樂喺Fan Festival派嘅打氣小物品，而且塞內加爾球迷嘅真鼓有成心口咁高，冇雷公咁大個又准帶入場，咩玩法？算了，呢件嘢唔同佢拗，即時丟掉，入場要緊。（之後有一次連旗棍都唔畀帶，但入到場前後左右都有人揮緊旗，佢哋啲棍就得，莫名其妙！）
入場後，場館嘅核心外圍都有唔少嘢睇，包括有大銀幕直播英格蘭場波，仲有DJ現場打碟、小食檔、紀念品店同3D影院，最開心莫過於周圍搵球迷影相留念（不幸有好多靚相事後遺失咗）。我哋hea咗一陣就正式走入場館核心，第一次嚟到咁宏偉嘅球場，未開波已經覺得好震撼，呢個球場可以容納近45000名觀眾，4x紅館。未夠鐘開波，先嘆番杯啤酒，當然係Budweiser Zero。
荷蘭球員賽前熱身。
大戰一觸即發，工作人員拖出一隻巨型大力神盃，配合悅目嘅煙火表演，現場氣氛無比熾熱。
雙方球迷吶喊集氣。
橙軍正選球員一字排開唱國歌。
3、2、1，開波，全場歡呼！雖然喺現場係睇唔清楚啲球員，好多時認唔到邊個踢緊波，爭議時刻亦冇重播，但氣氛勝於一切。
呢個moment終於出現，84分鐘，加普打破僵局，Yeah！
最終2:0完場，荷蘭旗開得勝，隊長雲迪克同「方丈」喺場邊密斟。
由開波到完場，塞內加爾球迷嘅鼓聲一秒都冇停過，整場波震耳欲聾。佢哋即使輸咗波，完場後仍然打鼓跳舞不離場，非常熱情。
橙迷當然興奮無比，場外慶祝猶如嘉年華。我哋就喺歡呼聲中盡興而返，完成咗今次人生解鎖。
港婦漂流：人生要現場睇一次世界盃！「全部球迷一齊大嗌一齊搖旗吶喊，真係好熱血，呢種感受喺電視機前面唔會感受到。」
是日賽果：
英格蘭 6:2 伊朗
塞內加爾 0:2 荷蘭
美國 1:1 威爾斯
by港佬
留言 0