政Whats噏：拍拖時每月送花　馮興禮婚後重質不重量

勞工及福利局局長政治助理馮興禮(Henry)去年七月結婚，佢近日講起，拍拖嗰陣每月都會花畀當時嘅女朋友，即係依家嘅太太，不過婚後送花次數大減，只有生日、拍拖周年、結婚周年等特別日子才送。聽落婚姻真係令一個人有好大轉變呀！

Henry話，雖然送花次數減少，但係標準提高咗好多，以前都係好普通咁買下花，依家特別喺網上訂購，訂到店家都記得佢太太叫咩名，而且呢間網店有得代客寫字，自己字醜，傳咗啲字句畀店家代筆，成件事都靚晒咁話。

今年係佢同太太第一個結婚周年紀念，問起佢日後結婚周年都會撞正立法會暑假休會前嘅緊張日子，咁點算好，佢就話，唯有希望盡量唔好撞正星期三、四、五啦，結婚周年紀念夜晚同太太食到飯已經好好，又話其實今年都有朋友約佢離港外遊，但原本有關產假開位等項目將會喺暑假前上會，所以唔敢行開，不過依家立法會已經提早休會嘞。

東網網站 : https://on.cc/

東網Facebook專頁 : https://www.facebook.com/onccnews/