阮民安稱「我愛人民幣，我更愛香港」：一定喺雞蛋呢邊
過去兩個多月，香港不時有大型遊行、示威和抗議行動等，更多次導致嚴重警民衝突。不少藝人為保飯碗，都紛紛表態愛國，甚至爭做護旗手。 阮民安（Tommy）是少有在facebook和IG上公開表態支持並多次參與遊行的香港藝人。早前他上載遮右眼的照片響應「Eye for Hong Kong」，近日亦有現身旺角，與市民在街上築起人鏈，以及身穿黑雨褸參與荃葵青區遊行。
Tommy身體力行支持抗爭，連累他的網紅太太Eva受內地網民追擊，在微博上屢被留言攻擊，指他們是「港獨」的支持者，揚言要抵制他們。昨晚（26/8）深夜，Tommy於個人FB專頁發表千字文《我很窮，我愛人民幣，但我更愛香港》。
《我很窮，我愛人民幣，但我更愛香港》原文如下：
呢個po會有點長，圖有點多，希望可以阻大家少少時間，認真睇曬佢！
由我開始俾大家關注到我支持今次呢個抗爭運動之後，大家都對我好好，但亦都有一個聲音就係：「佢梗係想靠呢次博翻身啦，佢都無野輸，有咩所謂，佢連搵大陸錢嘅資格都無呀！」
咁我覺得今次支持運動嘅重點，絕對唔會係放喺自己嘅感受呢個點度，所以我一路都無擺係心，繼續發聲，繼續每一刻都關注，身體力行支持！
直至琴日終於發生變化，就係突然間有大班大陸網民不停Cap我Facebook圖（可能呢篇文佢地都準備Cap，大家可以留言同佢地say個hi ）去我老婆Eva嘅微博，話我地支持港獨，然後攻擊佢，攻擊我！
咁既然係咁，我不如就一次過喺度將我心底嘅想法，我預計嘅損失同大家分享一下！
自從2012年開始，我就已經擔任住Eva經理人嘅角色，喺幕後為佢打點一切！呢7年入面我地由兩個個體變成一家四口，一步一腳印，營營役役咁將我地嘅生意 利用網路平台擴展到世界唔同嘅地方，包括 日本、台灣、新加坡、馬來西亞、美國，當然唔少得中國大陸！
因為Eva喺微博有大概25萬人follow佢，加埋佢嘅Style ，所以喺大陸一路都有好多工作，而喺大陸，我地嘅工作範圍包括（想清楚ーD可以睇埋下面D相)幫唔同產品出po宣傳，幫國際品牌官方影宣傳相，Fashion Show，電視台嘉賓，拍綜藝節目，品牌聯乘等，只要我地繼續好好咁做，唔好講咁多野，淨係靠呢D Job已經夠我地一家四口過唔會太好但亦一定唔差嘅生活！
仲有一樣嘢要講就係：正正嚟緊嘅9月14號，我哋自己第一次投資，EVA嘅自家品牌就會喺東京Laforet正式發佈，之後就會全世界發行，而最大嘅入貨地區一定喺大陸，而我地喺大陸處理品牌發行嘅負責人，係一個大陸最大嘅時裝公司高層（佢公司係帶頭將Undercover全國下架），我地喺大陸嘅Backup其實好好！
而因為我上年開始做返好多幕前工作，佢已經話要幫我安排上大陸嘅綜藝節目，發展下，賺下錢！但就唔好喺件事上面表任何態啦，以一個大家認為想翻身嘅我，理應乖乖收聲，甚至表態愛國！
但6月9號之後，見到香港人嘅團結，我已經忍唔住去開始公開表態支持(因為從來都係支持)，之後612、71、721等事件，直到今日呢個狀態，您地估下我知唔知道高調發聲後將會損失D咩？
我可能會失去一個龐大嘅大陸市場。咁點解我要咁做？可能係蠢…但其實，係良知！香港依家發生咁大件不公平不公義嘅事，要我為左賺錢而選擇扮不見不聞，甚至跪低表態愛國，支持警察打香港人，做什麼護旗手，對唔住，我做唔到！
當然對比起每一個手足受傷、犧牲、被捕，都係嗰句，我呢D損失，算得咩！
我依然相信，香港地靠我哋自己都一定可以撐得翻起自己，點解一定要靠大陸我地先搵到食，先做到生意，先搵到錢？我唔認為係咁！
雞蛋與高牆，我一定喺雞蛋呢邊！！！香港人加油！共勉之
Tommy 阮民安（@ekidztommy）分享的帖子 於 PDT 2019 年 8月 月 23 日 8:10 上午 發佈
撰文：機
留言 69