75歲羅浩楷時隔4年再現身 坐輪椅代步 心願開迷你音樂會

現年75歲的「扮嘢王」羅浩楷2015年拍完劇集《東坡家事》後因健康問題退出幕前，因椎間盤突出令腰骨無法挺直的他，10多年前患上柏金遜症，近年健康狀况漸差，手腳無力，出入要靠輪椅代步。羅浩楷時隔4年，近日再次現身好友鄧英敏的網上節目，鄧英敏陪伴他到輪椅店選購新「戰車」並談論近况。影片中的羅浩楷雖然要坐輪椅，但聲如洪鐘，精神不錯，說話時繼續風趣幽默。鄧英敏笑問︰「你屋企已經有幾架戰車，你今日又嚟揀戰車啊？」羅浩楷說︰「因為我想勁啲、靚啲、高大威猛啲，咁先襯得起你呀嘛，敏哥﹗（你心目中個budget係幾多？ ） 你估唔估到我銀包有幾多錢呀？ （我諗點都過萬。）咁梗係要啦﹗你上得嚟呢度買嘢，梗係要搵啲靚嘢嚟買，靚嘢就梗係貴，靚嘢點會有平嘅呢？」羅浩楷之後在職員協助下試電動輪椅，鄧英敏問他是否想要一部可以在舞台上升高降低的輪椅，羅浩楷笑言︰「咁樣先至叫巨星呀嘛﹗」他表示其心目中的輪椅除了能升高降低，還要夠快，才能符合他這個後生仔的要求。

鄧英敏在影片中談起羅浩楷希望開迷你音樂會的心願，羅浩楷說︰「我已經同導演講，佢好贊成，佢借個地方畀我，我喺呢度搞都得㗎，個個坐晒喺啲輪椅度聽，我哋喺度彈歌畀佢哋唱，佢哋喺度唱歌，做表演嘉賓又得，或者我自己唱又得，大家都好自由﹗我想唱咩歌？《李香蘭》﹗我大佬係玉置浩二，我叫玉置浩楷﹗」鄧英敏笑問他可想找玉置浩二、張學友一同合唱，羅浩楷風趣地說︰「佢唔得閒啊，佢有巡迴演唱會。我叫佢，佢一定要畀面嚟，就好似胡老楓咁。胡老楓話叫邊個，邊個都會嚟。」鄧英敏表示︰「我哋希望喺短期內搵一個細細嘅地方，真係以歌會友，可能60人左右。」羅浩楷說︰「做得好就做多幾場﹗有冇想邀請啲乜嘢特別嘉賓？冇啊，我淨係諗住我自己，自己顧自己。唱晒成個音樂會？唔係，我最多唱3隻。」羅浩楷表示音樂會要有現場樂隊，他拒絕唱MMO︰「冇氣氛啦，依家唔興㗎啦﹗老餅先至用MMO，畀人笑咩，大佬，你夠唔夠老啊？依家個個都係玩樂隊﹗」

鄧英敏最後表示不少朋友也想為羅浩楷介紹醫生，羅浩楷卻說︰「我覺得最好就係睇吓有邊隻股票近來好有前途，我就會介紹畀你，你就攞去黃大仙扶乩，睇吓得唔得。如果得嘅話，你就介紹畀啲觀眾，叫做《老友鬼鬼好number》，等大家執多少飲吓茶，振興吓香港，香港消費，好唔好？」

（即時娛樂）