港姐︱施宇琪試戴后冠　莫凡期待選完食火鍋

14位港姐候選佳麗今日（30日）以泳裝綵排及試戴皇冠，大熱之一的（7）施宇琪幸運抽中成為幸運兒試戴后冠。

講到試戴的感覺，施宇琪直言當時很緊張兼心情凝重：「因為個后冠價值不菲，我驚唔小心跌咗落嚟，成層樓就冇咗，無論比賽結果係點，我今日都係賺到，將來可以同小朋友講我都戴過香港小姐嘅后冠。」問到會否覺得是好兆頭？還是如外界言「講試戴后冠難奪冠」的魔咒？她自認是理性之人：「數據上嚟講係完全冇關，所以我係冇任何感覺，都係做好自己。（有冇信心攞獎？）太多未知之數，聽天由命，唔知到時會問咩問題又或者跣親都唔定，不過我已經做好準備，可以做嘅都做咗，例如節食減肥，我好滿意自己嘅身形，所以我好自豪。」

同屬大熱的（4）莫凡被問到信心時，她認為盡力就好：「我會享受個騷，冇乜期待攞獎，如果有期待就好難放鬆，我最期待係選完去食火鍋。」施宇琪即時搭訕謂若落選會即時衝到附近的便利店買零食大擦一餐。莫凡直言再減，體重也沒有大改變，決賽在即，自己反而有食朱古力增加能量：「因為最近嘅行程好密，又食得少，尋晚我覺得自己有少少低血糖，所以要補充能量，令自己頭腦清醒啲，我尋晚食咗好多嘢，但體重都冇變，我明天決賽都會食朱古力當餐。」

在網上人氣高企的（9）陳詠詩表示在決賽當晚會做自己，又謂近期每日綵排十多小時，沒有時間健身：「我只可以每日早晚做一百下Sit Up，同埋都買好多糖同朱古力補充能量。」問到心情是否緊張？她自言興奮多於緊張：「由入圍依家2、3個月，最期待就係決賽呢個騷，希望做到最好畀觀眾。（有冇以前體操比賽咁緊張？）都有啲似，但冇以前比賽咁緊張，因為我4、5歲第一次比賽，當時緊張到前一晚瞓唔到覺，依家已經習慣咗，將緊張變為興奮，有信心做好自己。」

東網網站 : https://on.cc/東網Facebook專頁 : https://www.facebook.com/onccnews/