娛圈單打︱呢頭情深款款　嗰頭孖女睇騷

熱播劇《執法者們》最為人津津樂道之處，肯定係緋聞情侶黃宗澤（Bosco）同蔡潔啦。二人飾演瀕臨離婚嘅夫妻，其實互相深愛對方。今次已經係佢哋第8次合作，無論戲裏戲外，Bosco都表現得對蔡潔一往情深喎。

女神蔡潔每次談起呢位好拍檔，都不吝讚美之詞，仲話對方答應，若自己創作嘅劇本能夠搬上大銀幕，會仗義擔當副導演，搞到蔡潔鬼死咁感動。之不過，二人始終「友達以上，戀人未滿」，Bosco只被女神歸類為「好兄弟」。正所謂女死女還在，生活還是要繼續，出名風流嘅Bosco，又點會為一棵樹放棄整個森林吖。

果不其然。K-Pop天王G-Dragon嘅世界巡迴演唱會仍在舉行，早前唱到去吉隆坡，吸引大票香港娛樂圈中人專程捧場。Bosco唔止赫然在座，身邊仲有年輕長髮索女添！雖然二人戴上口罩，但女方難掩出眾氣質，因而傳出伊人係Bosco女友！

當然啦，Bosco例牌否認，話當時係一大班朋友、有男有女一齊捧GD場喎，信不信由你，反正網民就唔多信嘞。梗係啦，Bosco出道至今，桃花運旺盛，緋聞女友名單一匹布咁長，當中只曾與胡杏兒公開戀情。不過杏兒始終等唔到對方安定下來，惟有狠斷8年情。Bosco亦樂得做冇腳雀仔，繼續孔雀開屏四圍飛。

直到遇到蔡潔，似乎終於點中「死穴」。之但係，女神又點會唔知男人嗰味嘢吖，一旦畀你追到手，分分鐘唔會珍惜，倒不如做「情人知己」好過。嗱，一個屈尾十，又見Bosco孖住新女睇騷，證明女神是對的！

東網網站 : https://on.cc/東網Facebook專頁 : https://www.facebook.com/onccnews/