伍家謙解釋奧運現場獨家訪問方法　「畀錢最簡單直接，個位幾靚都有」

今屆香港奧運的播放權由政府出資購入，4家電視台TVB、HOYTV、VIUTV及RTHK播放所有奧運賽事。4間電視台都有派員到比賽場地現場採訪，但大部分香港運動員，包括江旻憓、張家朗等於比賽後都由TVB第一時間做獨家訪問，之後才做HOY TV、ViuTV和香港電台的圍訪。

不少觀眾都提出疑問，竟然4間電視台都是指定電視台，為何只有TVB可以做獨家專訪？對此，前TVB新聞部體育組首席記者伍家謙在社交平台撰長文，詳細講解奧運採訪的經歷及傳媒的採訪安排。伍家謙提到，網上見到有人問，「點解有啲台可以做獨家訪問先？」他表示與其大家估估下，就分享自己現場採訪過兩屆奧運的經驗，解釋奧運採訪的規矩。

伍家謙透露，國際奧委會對記者採訪有很多規矩，「簡單講，一個比賽場館入面惟一合法做訪問嘅區域，叫做「混合採訪區」（mixed zone），所有完成比賽嘅運動員係必需經過呢個區域先至返到入後台更衣室嘅。」、「排得越前當然越著數啦。一般嚟講，排第一嘅一定係國際奧委會嘅channel，而且規定咗運動員一定要答；排第二嘅就會係主辦城市嘅個國家嘅官方電視台（例如倫敦嗰陣係BBC，北京奧運就中央台），至於之後嘅排位就開放自由競逐。」

伍家謙表示，競逐方法有兩種：一，畀錢；二，鬥早。「畀錢最簡單直接，只要肯科水畀國際奧委會，個位幾靚都有。入面光纖電掣乜都齊，而且只有你一間專享，其他人想入都唔入得；服務同價錢成正比，所以有意買位嘅電視台會係事前plan定，邊個場館最有機會攞獎，邊個運動員一定要問到唔可以甩，先至決定畀錢買嗰個場館入面嘅mixed zone位。至於一啲筆直少啲，又或者肯畀錢不過抽唔到（嗰啲採訪位數量有限，好多時每個國家／地區都只得一兩個名額，超額就要抽籤，肯畀錢有時都要講下運）嘅電視台，就只能夠叫隊crew早啲入場，希望霸到較前嘅採訪位置喇。嗰啲位一定會排喺畀咗錢嘅人後面，都真係幾後下；又因為嗰度所有記者都入得，亂起上嚟係會同打仗一樣，迫到飛起。其實行到嚟到呢度嗰陣，個運動員可能已經答咗同樣嘅問題幾十次，一般好少停低。」

最後伍家謙表示，「我哋嘅運動員係好好嘅，見到香港記者，幾乎一定會答；下次睇訪問，大家見到有台一個人單頭問先，有啲就幾十個咪牌堆埋一齊，大概就知咩事。」