娛圈單打︱忽然連撇兩條女　係咪為咗冧新女

G-Dragon嘅世界巡迴演唱會現正如火如荼地舉行，今晚就會完成澳門站尾場。殺入澳門前夕，龍哥罕有透過經理人公司連環否認兩單緋聞，女主角分別係Twice成員Sana，同埋8年5傳戀愛嘅After School成員李珠妍。連撇兩女，背後有冇咩隱情呢？

嗱，龍哥同Sana嘅緋聞已傳出超過一個月，之所以遲遲唔回應，係因為當時剛錄製Sana有份主持嘅網上節目，為免劇透，先至默不作聲。日前節目播出，龍哥終於可以說明原委，兩邊Fans一天光晒！

之但係同珠妍就唔同啦，早在2017年，珠妍喺社交網晒出四格照，全部都係同龍哥頭貼頭嘅密照，雖然秒刪，但已引發轟動。當地最強狗仔D社更喺2018年公開「元旦情侶」，圖文並茂二人同遊濟州，斷到正一正。

奈何龍哥堅拒認愛，只承認二人係好朋友。此後珠妍多次「手滑」，時不時就晒出密照，擺明好想公開關係，但男方不為所動。直到早前同Sana傳緋聞，珠妍隨即晒出一張抱貓照，貓貓同龍哥所養嘅貓貓同色，照片背景亦跟龍哥屋企相似，似乎想藉此宣示主權。

事隔個幾月，龍哥正式斬纜，斬釘截鐵話同珠妍戀愛並非事實。唉，演藝界好多地下情侶都玩呢招，一方放出密照逼另一方認愛，但十之八九唔會成功。話時話，過去龍哥同水原希子、小松菜奈、Jennie傳緋聞，從來冇強硬否認，粉絲解讀為間接承認。家陣咁清脆同兩女撇清關係，會唔會因為已有新歡，需要表態交代呀？龍哥最近如沐春風，大談理想型同夢想婚禮，話唔係蜜運中都冇人信。

東網網站 : https://on.cc/東網Facebook專頁 : https://www.facebook.com/onccnews/