蕭正楠爆翠如下「禁門令」 馬國明唔介意太太靚湯拍咀戲

蕭正楠﹑馬國明﹑馮盈盈﹑阮浩棕﹑鄭俊弘和陳曉華等，昨晚（28日）年廿九出席賀歲節目《喜迎金蛇慶豐年》。快做爸爸的蕭正楠有份獻唱，阿蕭笑言太太黃翠如有「禁門令」，他說：「佢叫我做完嘢快啲返屋企，初二我要去中山做嘢，諗住即日來回，因為要睇住佢（翠如），相信到時去到中山會有好多人畀利市我，耕耘咁耐終於有收穫。」

阿蕭笑指老婆好食得：「佢一邊食得好開心，但磅重又愁眉苦臉，我話呢個時候BB要長胎，重都係正常，係正常範圍重係可以。我唔會嗌停，食到佢覺得飽就會停。（幫手買外賣？）我應承佢生完BB後，帶佢旅行食嘢，會記低晒。今（昨）日佢突然想食腸粉，我揸車出去買，但年廿九好多店舖都閂門，佢啲emoji好多失望表情。」

馬國明表示蛇年不心急生BB，一切順其自然。談到老婆湯洛雯和黃子恆在劇集《富貴千團》中有激情戲，馬明笑言不會刻意去看，亦不會不准老婆拍親熱戲：「唔係唔睇，但我唔會特登摷嚟睇，我諗佢（靚湯）意思係呢樣。如果劇本係需要有呢啲場口，兩公婆咁恩愛，冇理由咀仔都唔惜一啖啩？電視尺度大得去邊？」

（即時娛樂）