頂流風波｜田啟文盼多包容　盧冠廷：做人比唱歌更重要

王晶日前突然於微博發文，怒斥MIRROR成員姜濤「人肥歌雞舞賤」，事後雖然刪文並改口指姜濤「冇錯」，但直言「師奶粉絲」才是害偶像的關鍵。事件引起網上熱議，不時與王晶合作的藝人田啟文被問到事件，坦言對王晶的言論並不了解，但認為圈中人應該互相鼓勵。

田啟文表示：「我睇到個標題好想睇嘅時候，佢已經刪咗，我都唔知佢講咩，但我睇到個標題係幾嚇人。我覺得晶哥有佢嘅立場，我個人會覺得要寬容啲啦，我哋呢個行業係要包容性強，同埋要鼓勵。唔會有人一出道就係天王巨星，總有一個過程，我哋行業要互相支持。」

同日，樂壇前輩盧冠廷亦被問到年輕歌手如何才能晉身「頂流」，盧冠廷認為唱功、獨特聲線與人品缺一不可：「首先你真係要識唱歌，第二要有自己風格嘅聲線，但最緊要你要係一個好人。如果你唱歌幾叻都好，但唔係一個好人，好快就會玩完。」

至於是否需要懂跳舞、身型健美，他笑言視乎個人風格：「唔識跳舞唔代表唔可以做歌星，有啲人唱歌勁到一碌木咁企喺台上唱都可以感動人，因為佢用聲線打動你。唔一定要走嚟走去，否則變咗小丑咁。當然，如果跳舞叻嘅又係另一回事。」

盧冠廷在西九戲曲中心出席《盧冠廷一生所愛演唱會2025》記者會後，亦分享早前在《Chill Club頒獎禮2025》獲頒「終身成就獎」的感受。他笑言當日才驚覺香港現時歌手人數眾多：「我攞獎嗰日先知原來香港有咁多歌手，成300人。以前邊有咁多？一間唱片公司咪得幾個人，點知而家成全人類都可以做歌星！」