繼上次柳應廷(Jer)及李駿傑(Jeremy)首次The First Take後，今次更加入姜濤及盧瀚霆(Anson Lo)，四子一同The First Take，重新編曲〈Rumours〉，上架半日已經吸38萬Views。當中集中精神演繹聲音的姜濤，更被柳應廷笑變「僵濤」。
首次The First Take的Anson Lo指：「〈Rumours〉是一首比較dark side一點，有點像trap music，比較hip hop的歌曲。它有一個性感的氣圍，是描述一個十分進取的追求女生的角度，十分進取的戀愛角度。但是這一次我們用了一個比較chill的形式去唱，沒有原曲那麼有氣勢磅礡的感覺，用了一個比較輕鬆的、特別一點的唱法。」至於姜濤，則指希望跟世界各地的觀眾介紹自己：「我們是來自香港的一隊組合，叫MIRROR。我們有12位成員，雖然這一次只來了4位，但希望下一次有機會可以讓所有觀眾可以看到我們12個人的表演。我們每一位都各自有擅長之處，亦有自己不足之處，所以希望大家可以包容我們、督促我們。我們會繼續做很多好聽的音樂和作品，繼續呈現給大家。」
今次4人合唱〈Rumours〉編曲簡潔加入大量和音，Jeremy表示：「因為今次編曲都係比較乾淨同Soft，所以當中用咗好多和音去Support件事。12個人去唱時力量好大，得我哋4個人第一次去做呢件事，就諗咗唔同嘅和音去令到件事更加豐富。TFT係好注重聲音嘅Platform，過程中練習咗好多次，坐喺度上堂時會一齊傾呢段應該點唱，點樣令到件事更加好，大家一齊去度個表演要點樣。」Jer指練習和音是很難得的學習過程：「因為MIRROR比較少唱和音，通常喺台上表演都係好大力跳舞，今次我哋特登為咗呢個Version練咗好多和音，學咗好多、唱咗好多，大家喺聲音上面都有好大嘅進步。」
Jeremy和Jer先錄〈人類群星閃耀時〉，二人有一定經驗，他們給予Anson Lo和姜濤一些錄音貼士，怎料姜濤說：「佢哋唱完出嚟好得戚！一見到我哋就話放鬆就得，好Easy。我同阿Lo就覺得你唱完一首就話啫。」Jer即反駁：「唱完第一首我哋係放鬆咗心情，但都有同大家分享耳機點樣調校音色，有俾Tips大家啦！」話雖如此，姜濤都自認在錄音過程中自己最緊張，他說：「我喺團隊裡面唱歌唔係最叻，唱歌進步空間仲好大，英文歌我又唔熟悉，因為少唱英文歌，對於英文嘅把握唔係好大，所以全程略顯生硬，同埋4個之中我係算比較容易有失誤，因為我容易搶拍，呢個係我嘅缺點，嗰時我都理唔到表情；喺一個注重聲音節目入面，自己嘅聲音拍子係準確就得喇！」
Jeremy都覺得姜濤表現可以更好：「姜濤喺Rehearsal嘅時候嘅Energy好好，但一去到Studio佢就僵咗！」就連Jer都認同道：「佢真係變咗『僵』濤！」
而其實在參與TFT之前，4人都曾看過頻道中的影片，他們都有特別推介：
Anson Lo推薦：Yoasobi〈群青〉
「呢首歌係一個朋友介紹我睇嘅，第一次入去聽，覺得感覺好青春，因為講緊夢想，Yoasobi好唱得，成首歌好有向前衝感覺。上年MIRROR休團時，每日一起身就即刻Click入呢條Link聽成日，因為帶咗好多正能量俾我。」
Jeremy推薦：ATARASHII GAKKO!〈OTONABLUE〉
「係4個女仔，會走位會跳舞，一路唱一路跳嘅表演，好勁！因為之前都有睇TFT嘅表演，冇諗過可以咁樣玩呢件事，好新鮮好勁，同埋又唱又跳得嚟聲又好穩定，Energy好大好正。」
姜濤推薦：女王蜂〈Fire（火炎）〉
「第一次睇TFT就彈咗呢條片出嚟，㩒咗入去聽。女王蜂係一隊Rock Band，知道主唱好犀利，起初以為錄好，點知原來係一Take過，就知道演唱技巧要有好高水準先可以上到呢個節目，印象好深刻。」
Jer推薦：Harry Styles〈Boyfriends〉
「Harry Styles帶咗隊Band上去，喺現場錄埋樂器都只可以一Take，好震憾！任何嘢都冇Mistake，和音所有嘢都好好。我都幻想過我哋可以帶隊Live Band過去錄音，希望有朝一日再有機會。」
