政Whats噏：葉劉淑儀女兒返港祝壽　取道歐洲形同流浪

為防疫情蔓延全球都採取入境限制，若要越洋跨國宜及早部署。議員葉劉淑儀嘅千金葉榮欣目前身處英倫，希望趕及下月返香港為葉劉慶生。不過港府已經禁止英國航班抵港，葉劉形容個女為咗返嚟，好似要流浪咁啊！

葉劉下月踏入71歲生日，愛女好有心想專程返香港為佢慶生，不過困難重重啊！首先係愛女接種第二針新冠疫苗後，出現嘅反應就好似畀巴士撞咁，發燒、發冷持續咗成晚。不過打完疫苗都冇得直接返香港，皆因英國疫情持續反彈，港府已經禁止當地航班到港。所以，葉劉形容個女依家好似要流浪咁，首先要喺歐洲搵地方踎21日，再度吓點輾轉回港。

其實早喺舊年聖誕，葉劉嘅千金已經想返香港同媽咪共度佳節。但礙於當時英國爆發變種新冠病毒而宣告封城、航班都被迫暫停。葉劉當時已經慨嘆唔知幾時先可以見到個女啊。

東網網站 : https://on.cc/

東網Facebook專頁 : https://www.facebook.com/onccnews/