Kayan9896致電舊公司　試當真急否認　TIAB自爆是當事人

Kayan9896（吳家忻）日前宣佈與「百億富三代」馬桂烽分手，剛巧華納唱片YouTube頻道前日播出Kayan參與樂隊Zpecial主持的節目《醉酒Don’t Call》。她在節目中表示在醉後打電話給「前公司其中一個人」，問對方有否生氣她離開公司。當不少網民都以為Kayan致電舊公司「試當真」的同事時，「試當真」在社交平台出帖文，寫道：「我們公司台前幕後並無收過節目電話」。事件發酵一日後，香港rapper兼作曲填詞人TIAB 今日（12月23日）下午出IG story，直認自己是Kayan「電話嗰個」。

TIAB是一名香港rapper，亦是作曲和填詞人，於2018年出道。他曾為Tyson Yoshi共同創造多首單曲《STRESSED OUT》、《That Guy》及《be mine》。同期又為Kayan9896製作多首作品《Be around》，《Not Too Close》及《Think I'm in love》。kayan9896在《2022年叱咤樂壇流行榜頒獎典禮》獲得「叱咤樂壇生力軍女歌手」銅獎。

TIAB今日在IG story直認自己是Kayan「電話嗰個」，又指「咁大班人恰個女仔」，他寫道：「唔洗估啦，電話個（嗰）個其實係我@kayan9896。忙緊台北開個人演唱會，冇乜留意新聞，冇諗過咁真誠嘅對答都滿城風雨，咁大班人恰個女仔，唔好再帶風向啦好無聊。睇黎好多人想佢死，但我就撐佢，吹咩？我諗大家都好多疑問，點解係我？忙完整理一下資訊再同大家長話短說。」

TIAB再出story解釋他的職務：「同大家交代一下我嘅背景：我自己本身有間公司 @makeinfuture.mif，旗下有平面模特、演員以及歌手。公司入面有形形色色有potential嘅人，當佢哋被其他大公司欣賞時，我哋公司都會採用co-management嘅方式去合作，始終我哋細公司比起大公司能夠為佢哋付出嘅資源更少，而我都會想旗下嘅Artist喺佢哋擅長嘅領域有更好嘅發展。」

TIAB再出另一個story分享他與Kayan認識經過：「我同Kayan嘅相識係佢入行既（嘅）第一個經理人介紹。機緣巧合之下佢舊經理人帶咗Kayan上我studio試音，我聽完之後覺得佢把聲好好，所以我就果斷決定用另一間音樂公司New age tone簽佢，而當其時佢份合約係co-management三方一齊簽。因為影視方面的而且確唔係我強項，咁理所當然就交返俾相關人士處理，而我就專注集中喺佢嘅音樂路上幫佢設計發展。」

TIAB表示為免有誤會，因此「企出嚟同大家撇清謠言」，他寫道：「佢第一年嘅新人年佢嘅四首派台歌，Be Around, Not Too Close, Hell No, Think I'm In Love 都係我幫佢填詞、作曲、再諗埋A&R既部份（除咗Hell No唔係我填詞作曲）。當時成績都非常之好，四首歌中咗兩首百萬點擊率，新人年都成功拎到女新人銅獎，自問已經超額完成。所以當時kayan喺節目打俾前公司同事嗰個就係我本人，我完全當之無愧，我亦都覺得我有份量去講當時嘅說話。相信好多人都唔知一個藝人可以有好多唔同方式嘅合作，而今次一個小小嘅酒後真情剖白令到大家有咁多誤會，所以我先想企出嚟同大家撇清謠言。」