政Whats噏：民主黨大會未表決是否參選　交中委會處理甄選機制

近日有關民主派應否參選的問題鬧得沸騰騰，民主派亦分為「主戰」同「反戰」兩派，民主黨內訌愈演愈烈。民主黨今日(26日)會員大會決定係咪參選，點知最後竟然係無決定選定唔選，淨係話會將提名同報名參選程序交畀中委會處理，令人完全摸不着頭腦，似乎同先前嘅講法以都自相矛盾。有黨員更認為呢次交由中委會決定嘅做法，其實咪即係開放畀選囉！只係死口都唔認啫！

民主黨主席羅健熙喺特別會員大會後嘅記者會中話，會上有唔少黨友認為未有黨員發出參選意願，所以認為黨唔需要急住作出參選決定，但另一方面亦有黨員擔心會因此出現黨員即使希望參選，但唔敢表態嘅情況，故會員大會決定授權中委會處理，中委會將設甄選程序，若有人報名，就會安排相關黨員接受質詢，再視乎有否資格參選。

羅對會議未有具體決定表示抱歉，都承認決定同之前講法有落差，但佢就相信呢個係最有效、最唔會被挑戰、以及有利黨內團結嘅決定，又可以為黨員提供渠道表達參選意欲喎。

之不過，呢個都唔知算唔算係決定嘅決定就疑點重重，事關民主黨嘅所謂決定令人感到佢哋只係拖延時間，希望大眾對民主黨公唔公布參選呢件事淡忘，更加似係想將是否參選嘅責任推畀想參選嘅黨員囉！

喺記者會上，羅都被問到個別「主戰派」黨員有冇出席，羅就話唔會特別評論喇，但強調無聽聞過有黨員明確表示希望參選。據悉，民主黨黨內嘅「主戰派」，即前議員鄺俊宇、副主席梁翊婷同中委蘇逸恒都無出席，而另一個中委曾自鳴雖然有出席但就無發言喎。

不過，講到最大嘅主戰派，就一定係民主黨創會黨員、前議員李華明喇！李早前已表明民主黨應該參選，話若果民主黨決定不參選，將會無奈退黨。佢形容今次會議未有決定係「幾好」，又希望「畀啲空間中委會決定」。佢又話本來以為自己支持參選係少數派，但發現會議上有唔少黨員有相同意見，對此感到意外，又話該黨應該會再召開會員大會嘅。

話時話，喺前一段時間有指民主黨內部大多主張唔參選，搞到好似畀建制派逼埋牆角咁，但係特別會員大會決定唔到，又話交畀中委會設甄選程序，似係開條參選路，再睇吓支持參選嘅李華明話做喺特別大會上發現唔少黨員有相同意見，睇嚟事有蹊蹺，究竟邊個冇講真話？

東網網站 : https://on.cc/東網Facebook專頁 : https://www.facebook.com/onccnews/