人品好，牌品自然好！TVB重播《嚦咕嚦咕新年財》賀年必睇重點

賀歲片新不如舊？《嚦咕嚦咕新年財》，你今年翻看了沒有？TVB周日影院，再次重播這部2002年的賀歲片，百看不厭，絕對有原因，記得留意下列重點！

1）陣容勁

劉德華、梁詠琪、劉青雲、古天樂、應采兒賀年獻技，個個駛出最勁，劉德華古天樂被打，古天樂輸剩條睡褲，劉青雲扮搞笑奸角，梁詠琪更造型百變，拍警察拍大胸扮掃把頭，如此陣容再聚，最多都是合拍警匪片或者內地特技大片，所以值得笑住翻睇！

2）配角正

主角勁，配角又正！甘草黃文慧飾演劉德華的腦退化阿媽超好笑，時而正常，時而發作，不知何時鬆牌、何時誅牌，好笑過劉德華。另一飾演劉青雲阿爸的天林叔王天林，那些反應shot好好笑，與劉青雲產生奇妙的火花。值得一提，留意劉德華的上下家牌友，如湯盈盈、鄒凱光等人，一樣好好笑。

3）金句多

「人品好，牌品自然好」、「麻將回來必有因」、「愈爛嘅牌就愈要比心機打」，《嚦咕嚦咕新年財》內含不少富有意義的金句，以麻將比喻人生。要知道，此片編導為杜琪峯、韋家輝，而不是王晶的典型賭片。

4）橋段爆

賭片又好，賀歲片又好，怎樣能夠讓麻將大師以至完全不懂麻將的人，都能看到捧腹大笑？《嚦咕嚦咕新年睇》就有這種能力，不管是日本牌、美國牌的交換牌、過三棟，還是加飯粒變五筒，甚或是無聊搞笑的通水出千技，每十分鐘就來一次爆笑情節，令人深深記得！

撰文：二弟