王傑被爆童年淒涼被家暴　因1事跌落人生谷底

現年62歲，有「樂壇浪子」之稱嘅王傑，分別憑《一場遊戲一場夢》、《誰明浪子心》紅遍華人地區，正當爆紅之際卻突然沉寂，之後佢亦曾喺節目自爆被下毒致失聲兼脫髮，令佢承受唔少壓力。而近年不時透過社交網同粉絲分享點滴嘅李修賢，日前亦拍片大爆王傑童年點滴，並直言王傑童年時期好淒涼：「王傑當時10幾歲，同我姪仔好Friend年紀差唔多，佢爸爸叫王俠，哥哥叫王羽，唔係武俠片嗰個。佢嘅童年好淒涼，爸爸脾氣非常唔好，一啲唔啱就打，佢知道老竇開工就通山跑，我就成日帶佢哋遊山玩水，即係依家嘅科技大學，以前成個山頭隨便搭布景嘅。」

此外，李修賢亦透露王傑年輕時仲好百厭，13、14歲就會趁佢開工時偷揸電單車，但之後80年代王傑喺台灣爆紅時，李修賢仍忍唔住戥佢開心，可惜90年代王傑移居加拿大溫哥華後，竟然沈迷賭博：「我聽我屋企人講佢成日去賭場，喺溫哥華賭場輸咗好多錢，後期返嚟，人生真係好快，眨眼睇住呢個細路起起跌跌。依家佢都過60，有冇錢唔緊要，冇錢唔死得人，最緊要身體健康！」

東網網站 : https://on.cc/東網Facebook專頁 : https://www.facebook.com/onccnews/