盧覓雪回應質疑姜濤智商言論︰我嘅語氣係關心

盧覓雪昨晚（18日）現身灣仔書展，為其新作《台灣好味道》舉行簽書活動，獲唐詩詠、商台節目《在晴朗的一天出發》拍檔阮子健與張志文，以及早前遭解僱的《晴朗》助理蔓兒到場支持。就上月尾於《晴朗》質疑姜濤智商有問題，盧覓雪受訪時首度開腔，聲稱其言論遭外界誤解。

她說︰「大家都冇聽清楚我講乜，其實我係引用佢見記者時所講嘅說話。我覺得記者關心得好合理，佢係咪情緒有問題？佢話冇問題，食咗藥、飲咗酒去跑步，當時4點幾。我係用咗幽默感，如果情緒冇問題，智商應該有問題。天文台每日都有公布日落時間，如果要睇日落，未免早咗啲，曬到你暈都睇唔到。我嘅語氣係關心﹗不過，言者無心，聽者有意。你要砌我，我都冇法子解釋﹗」

盧覓雪稱明白姜糖們（姜濤粉絲暱稱）因護主深切而不滿，反而姜濤就回應得落落大方。她說︰「我呢啲前輩同長輩，點會唔關心年輕人。」她否認是姜糖，強調支持每位表現出自己的年輕藝人，與呂爵安、盧瀚霆、江𤒹生及男團ERROR等曾經合作的年輕藝人更熟絡。盧覓雪表示︰「香港娛樂圈靠呢班年輕人接棒。我點會想呢班年輕人唔好。不過，有人想從中作梗，我都冇辦法。」

被問到事後可有致電姜濤或MIRROR經理人花姐（黃慧君）解釋，盧覓雪稱沒姜濤電話號碼︰「我都想有。如果有，我直接打畀佢都冇問題，但花姐就免喇。透過中間人嘅話好複雜，當面講好啲。姜濤話有機會都想識我呢個前輩，如果有機會，我當然好願意識呢位後輩，大家就等呢個機會喇﹗」

商台事後在節目重溫刪除她質疑姜濤智商的說話，盧覓雪稱不知道，相信是因為有人投訴，電台考慮到聽眾的感受後作出此決定。她說︰「既然咁樣，我覺得處理得好合理，冇問題，冇難受感覺，唔會認為商台處理不公。商台冇問過我，冇懲罰，亦冇解僱我。即使解僱咗蔓兒，亦唔關呢件事，唔好混為一談。既然大家入我數，我唯有私人請佢做助手。」盧覓雪表示商台是因架構重組而解僱蔓兒，與她無關，兩人感情好，不時相約午膳，自己的情緒亦未受影響，繼續開心地開咪做節目。

（即時娛樂）