MC張天賦與女主角疑似接吻　粉絲洗版揚言罷睇MV

MC張天賦頻頻出歌，昨日（9月4日）推出今年第五首主打《與我無關》，更延續與《抽》女主角詹子萱的故事。

7月底推出《抽》後，剛推出的《與我無關》MV即登上YouTube熱門音樂影片第一位。不少歌迷都好奇MC與女主角的故事走向，昨日MC釋出預告見到子萱衝向MC疑似接吻一幕，安撫粉絲話：「放過自己，唔好炸我」，令賦二代齊齊留言話要罷睇MV只聽歌！昨晚MC在社交平台寫道：「冇錫到呀！咁可以loop爆佢啦」。

今次MC化身餐廳待應同外賣員，與女主角有更多對手戲同互動。二人非常投契，齊齊釣蝦，MC輕鬆釣到即刻炫耀一番，但見隻蝦仲生生猛猛又有啲嚇親。MC被人貼了一包零食在背脊，當他發現時，竟然是即刻想起自己有首歌叫《乖乖報到》，更即場清唱幾句。

一向給人壞男孩形象嘅MC，當拍攝子萱衝向自己面前一幕的試戲，未知MC未準備好還是真怕羞，竟然被子萱突如其來嘅舉動嚇得怪叫出來，壞男孩形象盡毀！！

而在MV首播前，MC開live同大家傾偈，提起最近一次過剝咗四隻牙，痛到瞓唔到覺所以都無哂心機。而MC即將開始排練澳門演唱會，亦透露有機會唱新歌。另外昨日剛看了上年參與拍攝的喜劇《夜校》試片，佢自己都覺得好好笑。