《阿諾拉》奪奧斯卡5獎成大贏家　谷德昭直認唔識欣賞：最佳電影喎

「第97屆奧斯卡頒獎典禮」於香港時間今早（3月3日）8時在美國洛杉磯舉行，電影《阿諾拉》（Anora）於6項提名中奪得5個獎項，成為全晚大贏家，包括最佳原創劇本、最佳導演、最佳剪接、最佳女主角及最佳電影。女主角麥琪麥迪遜（Mikey Madison）更擊敗賽前大熱的《完美物質》狄美摩亞（Demi Moore）和《艾美利亞變奏曲》Karla Sofia Gascon首度奪獎封后。

一向支持電影業的谷德昭，今日下午在社交平台發文，直認「唔識欣賞」《阿諾拉》，「最佳電影喎，套戲有咩大或小道理想講呢，我真係睇唔到」，他更直言：「大概係荷里活資方的一聲悶哼，向收緊幾億幾千萬酬金的大支嘢台前幕後嘅一份致意：你哋班大卡士可以喫蕉了」。

谷德昭發佈的帖文寫道：「真係唔識欣賞，唔明點解周圍拍爛手掌，仲攞埋奧斯卡最佳電影、最佳導演、最佳原著劇本、最佳女主角，搔晒頭。最佳電影喎，套戲有咩大或小道理想講呢，我真係睇唔到，唯一諗到嘅得獎原因係，套戲拍咗幾嚿水美金，好抵拍，又係好獨立吓嘅獨立電影，大概係荷里活資方的一聲悶哼，向收緊幾億幾千萬酬金的大支嘢台前幕後嘅一份致意：你哋班大卡士可以喫蕉了！」。

《艾諾拉》（Anora）講述麥琪麥迪遜飾演的脫衣舞娘與一位俄羅斯富二代陷入詭異愛情的經歷，製作成本只有600萬美元。2024年5月於第77屆康城影展獲得最高獎金棕櫚獎；2025年3月奪得第97屆奧斯卡金像獎最佳電影、最佳導演、最佳女主角、最佳原創劇本和最佳剪輯5項大獎。