黃淑蔓出道10年首開歌迷聚會暨生日會 自爆在家練歌嚎哭

黃淑蔓（Feanna）日前出席粉絲為她籌辦的24歲生日派對，她表示這是出道10周年以來的第一個歌迷聚會兼生日會，非常開心和感動。Feanna在派對上唱出新歌《未至於》及Whitney Houston的《I Have Nothing》答謝粉絲。她表示︰「第一次出席歌迷聚會同生日會，所以好開心，我好多謝大家好用心咁搞咗一個聚會畀我哋，真係好開心可以見到咁多熟悉嘅面孔。」談及特別選唱《I Have Nothing》原因，她說：「我平時喺屋企練歌會唱呢首歌，每次唱都會諗起大家，因為歌詞講中咗我想同大家講嘅說話，冇咗你哋我真係乜都冇，尤其第一句『Share my life, take me for what I am ～ 'Cause I'll never change all my colors for you』，呢啲都係我想同佢哋講嘅說話，所以有時喺屋企練呢首歌時會喊到傻咗。不過，我呢日有少少偶像包袱，同埋少少緊張，只係有少少眼濕濕，未至於喊嘅。」

除了唱歌，Feanna與粉絲玩估歌名遊戲，更幾乎講出每位舉手搶答的粉絲名字。她自言記性麻麻，但因為不少粉絲追隨了很多年，都是熟悉的面孔，加上去年親手寫聖誕卡給粉絲，因此盡力記住了每一位的名字。Feanna當日亦在服裝上花了小心思，她笑說：「我著咗《我的受保護動物》MV拍攝嘅服裝，從頭都腳都一樣，唯一唔同係我瘦咗，所以條褲有啲鬆。」 除了表演唱歌和玩遊戲，她還帶了多份私人珍藏作為抽獎禮物，與眾同樂。現場布置和應援物都令她非常驚喜，尤其是貼滿她出道以來每首個人單曲的靚相，她說：「希望未來每一個10年都有大家！」說罷Feanna又眼紅紅。說到生日願望，Feanna祝願大家身體健康：「最大嘅生日願望，係每一年生日都有粉絲同我一齊慶祝！」她表示出專輯、唱更多好歌和更多表演機會，是每一天的願望，還高興地透露正籌備今年第3首派台歌。

（即時娛樂）