何伯新何太繼續開直播　向細女追討亡妻首飾＋450萬

TVB節目《東張西望》早前播出76歲何伯與年輕逾30歲新何太的閃婚事件，引起全城關注。何伯與新何太近日經常以內地社交平台開直播。早前何伯在直播期間攞出筆記，公開每個仔女的欠款數目。昨晚（5日）新何太在粉絲群貼出已故何太的遺物照片，表示「這些都是何生亡妻剩下的，在佢細女保險箱。」結果引起網民圍剿。

今日新何太再與何伯開直播，何伯表示：「（亡妻）啲首飾多過我現任妻子，仲有啲首飾手鏈，鑽石戒指係埋晒嗰度。」、「仲有翡翠玉鈪喺骨灰罈，佢好鍾意咪一路陪住佢，有啲首飾喺我細女保管，我一定要攞返。」

提起送給亡妻的首飾，何伯表示：「嗰陣時我冇夾萬擺咗喺細女嗰度。」何伯強調亡妻的首飾並不是送給細女，他說：「淨係畀佢保管，亡妻走咗梗係歸返我啦！」何伯透露，當年買給亡妻的首飾「有十両幾金。」、「擺喺自己嗰度，如果第日冇錢就攞嚟賣返出嚟之後用。」

至於細女將他的450萬養老金全數提走，何伯在直播中交代最新進展：「梗係要攞返嚟，一定攞到返嚟啲錢係我搵返嚟，如果唔係點我都唔眼閉，我決心攞返返嚟，我要用嚟養老，全部攞晒我，留得嗰$4200，$4200點夠啊！」

何伯與新何太表示沒有錢請律師，惟有申請法援。何伯表示：「俾足時間我細女，如果逼到我最後同佢喺法庭見，法庭一見盜竊咗我啲錢，佢就要坐監。佢冇問過我冇通知過我，就等於偷我啲錢走。佢唔認我呢個老竇，我就唔認我呢個女。」