頭條獨家丨陳嘉慧最尊重大師兄張振朗 首當女一壓力大要游水減壓

TVB正力捧年輕新人上位，25歲嘅陳嘉慧(Erica)火速成為新劇《愛上我的衰神》女主角。處女下海孭重飛，Erica坦言有壓力，加上角色有啲沉重，拍罷後要去游水減壓。當問到係咪乘機晒吓身材，公開內外兼備？Erica即耍手擰頭否認：「唔係呀！只係想畀人睇到我煥然一新咋。」採訪：方騫平 攝影：葉君海 髮型：Terence Chan 化妝：Ivymakeuphk 服裝：Myaleshia 場地：浪.居酒屋

陳嘉慧受《降魔的2》監製方駿釗賞識，新劇《愛上我的衰神》搵她首當女一，劇中派衰運畀胡鴻鈞，不過，因憐生愛發展出感情來，陳嘉慧最難忘要獻出螢幕初吻給胡鴻鈞。

被胡鴻鈞整蠱

Erica憶述說：「初拍kiss戲，roll機時本能反應係要避開，所以好自然會推開佢，拍呢場戲正值係凌晨4點幾，為咗唔好阻人收工，唯有鼓起勇氣，嗱嗱聲拍好佢，睇返Playback都覺得有啲怕醜。而胡鴻鈞知我嘅『第一次』係會有啲緊張，佢就帶住我去拍，又搞Gag問我『感覺點呀？舒唔舒服？好唔好咀？』佢成日整蠱我㗎，真係頂佢唔順，可能劇中佢冇乜嘢講，所以鏡頭以外變成開籠雀。另外，因為有場戲喊到好崩潰，拍完頭幾日都仲係心情低落，好彩當時喺夏天可以約埋劇組出海放吓電。」

陳嘉慧畢業於第29期電視藝員訓練班，入行僅4年已「升呢」做女一坦言好幸運，她稱好尊重訓練班大師兄張振朗：「我同佢唔熟，年前同佢拍《機場特警》，我只係演護士仔小角色，但佢好主動幫我向劇組提出除口罩出鏡，等新人有多啲曝光機會，佢真係好照顧後輩㗎。我喺佢身上學到要keep住演戲熱誠唔好氣餒。」

立即下載 | 全新《星島頭條》APP : https://bit.ly/3yLrgYZ