肥仔@TomFatKi宣布退出　疑爆福正女友肥蛙監控對話

憑《天水圍Gang Gang》令不少香港人認識的TomFatKi（光頭幫，簡稱TFK），成員包括福正、肥仔和阿奇，亦有Billy Choi、李一丁、東城、何圖、Gary等合作做歌。

TFK愈來愈紅，去年於麥花臣舉行演唱會，但自7月出席音樂祭後，似乎沒有新動向。隊員肥仔昨晚（9月4日）撰長文宣布退出TFK，並大爆「有自己人容許女朋友登入WhatsApp監控對話」，矛頭直指福正與其YouTuber女友肥蛙。肥仔發現後感覺被嚴重侵犯私隱，自此大家「根本唔夠膽再繼續溝通」。

肥仔的退出宣言全文：「我知道呢幾日福正搵過好多人，想搵我出黎，首先我想同大家講我安全，令大家擔心我好對唔住，我性格需要好長時間去消化一d對我打擊好大既（嘅）事，多謝大家體諒。我決定退出tomfatki。福正係中學開始認識既（嘅），我最好既（嘅）朋友，以前成日周圍去玩成日係條街諗橋，果陣真係好開心，後來有埋阿奇，我地三個一齊成長，到後期認識埋何圖東城一丁 Billy Gary，我地一齊玩，一齊做野，仲越黎越多人鍾意我地（哋）。果陣我地（哋）唔理有無人睇都好，最緊要係我地（哋）成班Homie一齊做作品。」

「到早兩年疫情開始，我地（哋）完全失曬方向，果陣時福正開始同肥蛙拍拖，我知佢比（畀）左（咗）好多意見想法我地（哋），提出左（咗）一d可以係studio拍到既（嘅）方案，令到件事可以繼續發展落去，我知果時需要行動力，但係肥蛙成功既（嘅）方式同我地（哋）成班Homie成功既（嘅）方式係一定唔同，無辦法將佢既（嘅）方法複製落我地（哋）到，但係我尊重，因為福正除左係tfk之外，都係一個男朋友，我明白點解要提出呢d方向，所以我同阿奇一樣，選擇左（咗）迴避同沉默，唔講傷害左（咗）大家關係既（嘅）說話。我好感激你地既（嘅）付出，我同阿奇因為個人感受拒絕，其實我地（哋）都好慚愧，要你拉住我地（哋）行咁，對唔住。」

「而時間越黎越耐，大家既（嘅）核心思想唔同左（咗），以前係成班人去邊到演出都一齊係好開心，後來福正覺得越黎越多人加入我地（哋）係壞事，會分薄左（咗），利潤，但我最享受既（嘅）係一班人一齊玩一齊做野（嘢），而且我相信我地（哋）一班人力量大咁多，可以做到既（嘅）野（嘢）亦都唔係我地三個自己可以做到既（嘅），反而有機會可以令我地（哋）行得更遠，何圖 東城 一丁 Billy 佢地（哋）幾個好支持我地（哋），我都好想努力回饋番比（畀）佢地（哋），做到好成績大家一齊上。」

「年頭大家去日本，我以為可以修補到大家團隊關係，我地（哋）有機會real talk，講左（咗）好多收埋係心入面好耐既（嘅）野（嘢），當時真係以為我地（哋）好番，可以好似以前咁繼續一齊玩一齊做野（嘢），但係一返到黎香港，所有係日本傾既（嘅）野（嘢）都好快都打回原形，呢一下我真係深受打擊，而且我自己屋企都發生左d 事，真係處理唔到咁多野（嘢）。兩次演唱會，我地（哋）都要面對有成員覺得我地（哋）漠視過佢既（嘅）意見，提出退團，呢個決定都令我好心痛，兩次每個部門都做到無覺好訓（瞓），點解可以一句話唔黎（嚟）就唔黎（嚟），而你覺得我地（哋）對你做成傷害既（嘅）感覺，對於我黎（嚟）講更加係一種痛。」

「導致我地（哋）唔可以再繼續玩落去，係當我地（哋）發現原來有自己人一直容許女朋友登入佢既（嘅）WhatsApp. 一直監視住我地（哋）個group同其他對話，而我地（哋）全不知情，嚴重侵犯我地（哋）私隱，發現左（咗）之後我地（哋）根本唔夠膽再繼續溝通，就算見面傾，竟然唔係錄音就錄影，我見到一個最親既（嘅）兄弟做到呢一步，我除咗嬲到唔識比（畀）反應，我甚至會反思究竟我地（哋）係咪真係對你咁差令到你會咁，我個人係內向，好多野（嘢）唔識表達，但我好珍惜我地（哋）既（嘅）友誼，我想一班人一齊做歌，一班人一齊拍片，一班人一齊進步，咁先係對觀眾最好既（嘅）回饋。TFK無辦法再行落去我好心痛，好唔開心，收埋左（咗）自己一段時間，今次應該係我打得最多字既（嘅）一次，我都唔想搞到咁，但我更唔想再繼續咁，對唔住各位，希望大家體諒」

View this post on Instagram

A post shared by Lai Tai 肥仔 (@fatty_tai)