《學是學非》火博士疑被爆桃色醜聞　科大女學生：要我幫佢自慰

在電視節目中大玩火焰實驗，因而得名「火博士」的36歲科大化學系講師陳鈞傑（Jason），被科大女學生出post爆料，指控被他「摸上半身」和被要求「幫佢自慰」。

一名科大女學生在IG帖文，指控「火博士」陳鈞傑（Jason）對她提出多次性要求和越軌行為，並表示有保留證據，包括精液DNA、錄音等，希望身為天主教徒的火博士「仲有少少良心去承認呢啲事實」。

科大女學生寫道：「唔希望係一時衝動，所以我自己都諗咗一個星期，終於決定借呢個平台同大家講一件事，係關於我同好多人都識嘅陳鈞傑博士 Dr. Jason K. K. Chan，亦即係TVB學是學非嘅「火博士」、以前玫瑰堂嘅禮節司（而家係進教之佑堂特倫多團體）、近年教宗音樂會負責設計booklet/souvenir嗰位、亦係大家喺廣告、新聞、訪問見到嗰個半公眾人物。」

「我識Jason Chan嘅時候係2018年，嗰陣因為聯校科展同埋HKUST Summer Institute，令我同佢熟咗。嗰陣差唔多日日都會見面，喺實驗室準備科展demo需要用嘅實驗材料。有一次因為玩tsumtsum鬥高分騷擾對方，而開始咗啲身體接觸。嗰一排，佢幾乎每晚會喺佢科大嘅Office張梳化攬住我一齊瞓覺。」

「2020年9月，我正式入咗科大。2021年1月某一日，我因為我鍾意嘅男仔（簡稱 Y）所以好唔開心，第一次喺Jason面前喊，Jason Chan攬住我同我講：「Y有咩好啫，我好唔過佢咩？唔好喊啦，我做你一日男朋友安慰你啦。」嗰晚佢就開始伸手入我嘅上半身，開始摸。我無反抗，只係識不停喊，個腦淨係諗住啲唔開心嘅嘢。」

「嗰晚佢喺office攬住我，我哋兩個一齊喊，由凌晨十二點喊到第二朝六點。佢一路喊一路同我講：「我好愛你，但比（畀）唔到名份你，我唔想再咁樣傷害你呀。愛你所以唔想傷害到你呀。」

「至於點解佢會話傷害我，係因為2020年9月，佢開始推我隻手去佢嘅男性私人部位，要我幫佢自慰（俗稱打飛機）。作為一個A0天主教徒，我嗰陣係真驚又乜都唔識。佢拉開褲鏈同我話：「對唔住呀，我忍唔住喇…」我嗰陣係無膽反抗，呢樣亦都係我做得最錯嘅事。嗰一晚佢FaceTime我嗰陣同我講：「對唔住呀，頭先有無嚇親你呀？見到你我忍唔住。」第一次幫完佢嘅第二日，我坐喺聖堂不停咁喊，覺得自己好污糟。我無反抗到第一次，就已經開壞咗個頭。佢之後就差唔多每次見面都要。我每次幫完佢都會同Y講又發現咗咩事，Jason Chan嗰日又點傷害我。Y同我講，為咗保護自己，要開始留證據。所以我連Jason Chan嘅精液DNA、錄音等等乜都有，每次幫完佢都有將時間記低。」

「其實啱啱識Jason無幾耐，喺office跪低幫佢執嘢，佢撥開我啲頭髮想睇我件衫入面，我一切都知道，只不過係唔夠膽反抗。何況之後越嚟越熟，我更加唔敢反抗一個朋友。我明白我有好多做錯嘅地方，而我都承認心軟、無反抗、無離開佢係我嘅責任。」

「以上所講嘅嘢都係事實，無論佢最後見到之後唔承認定係點，我諗我有晒對話同埋錄音證據，加上佢仲係一個天主教徒，相信都仲有少少良心去承認呢啲事實。」