巴士安全帶修例江玉歡認低估措施影響 去新加坡搭巴士「有啲感慨」｜Ray Online
安全帶新法例即日起生效，搭巴士嘅乘客只要座位有安全帶就必須佩戴。相關法例修訂以「先訂立後審議」程序喺上屆立法會進行，時任立法會議員江玉歡話當時呢條法例同網約車法例同期審理，承認低估咗巴士安全帶呢一部分措施，但之後留意到坊間嘅反應，只好盡力表達市民大眾意見、接受大家嘅批評，「遲講總比逃避好。」
關注係咪一有風險就要立法禁止
運輸署近月每當講起巴士強制戴安全帶規定，都有提過新加坡都有類似要求。呢兩日去咗新加坡嘅江玉歡，今朝搭巴士去加東如切，期間望住對面冇安全帶嘅巴士座位令佢有啲感慨，質疑喺香港市區街道行走嘅巴士係咪真係咁危險，而所有有風險嘅事亦係咪要立法禁止加罰則，「餵鴿、店舖阻街、巴士安全帶之後，還有甚麼？一個城市總不能靠加罰則，以求市民的合作。」
江玉歡話，市民對於巴士強制戴安全帶呢件事都有唔少意見，佢相信民間都有可以實踐嘅智慧，關注一眾立法會議員或者主事官員會唔會回應下市民意見、表達一下睇法，例如行快速公路嘅巴士可唔可以改為自願戴安全帶，直言愈早接受市民意見，帶嚟嘅反應就會愈正面，感嘆透過立法要展示嘅是理性與溫度，而唔係距離。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)