游嘉欣搣乖乖女形象　拋胸生擒吳偉豪

無綫小花游嘉欣（游游）夥拍吳若希、戴祖儀拍攝綜藝節目《尋歡作樂的姐姐》時，曾因不滿自己表現而自責落淚。但拍劇方面，游游4年前已擔正短劇《青年心城之撐起青春》女主角，之後不乏機會，演技與日俱增。在昨晚首播的無綫新劇《非常檢控觀》更接受新挑戰，一洗清純形象，在生擒吳偉豪的床戲中，其美腿及事業線近距離任睇，網民大呼有睇頭。

官網日前釋出宣傳片，見吳偉豪大晒麒麟臂躺在床上，穿低胸小背心及熱褲的游游飛撲到他身上，吳偉豪緊張到吞口水兼硬晒軚，出手推開女方，但她失平衡向前仆，雙方距離變得更近，幾乎咀嘴。

鏡頭一轉，畫面重現兩人在劇集《回歸》的床戲，游游趴在赤膊的吳偉豪身邊怕醜表白，但切回《非》劇畫面時，她即Man爆一手推男方落床，兩劇的風格完全反轉，連吳偉豪睇到都頂唔順，留言：「仲諗住播嘅時候去到呢場戲會畀觀眾一個驚喜，估唔到喺呢度就出咗。」游游亦留言：「喺度畀個驚喜我哋。」

情侶挑戰放笑彈

兩人為力谷CP感，又在網上分享挑戰Couple Challenge的短片，吳偉豪把游游橫放上肩膊時，谷到臉都紅晒，似乎負荷過重，游游亦狀甚辛苦，非常搞笑。

另外，游游前晚再上載多張背心熱褲靚相，寫道：「本身我個人都幾爽同男仔頭，覺得短髮比較貼合番我真性格，又啱呢個角色。作為演員希望見到我嘅變化，唔係得個乖字。」談及劇中「女追男」，她表示與吳偉豪默契有增無減，但現實中較希望男方做主動。

東網網站 : https://on.cc/東網Facebook專頁 : https://www.facebook.com/onccnews/