陳健安抱病開騷失聲自責　得亡父保佑唱《梨子》如有神助

歌手陳健安（安仔）於西九舉行一連兩場的《時的狀態》演唱會昨晚（12日）舉行尾場，圈中好友包括陳柏宇、陳蕾、黃淑蔓、鍾雪瑩、雲浩影、及DJ黃正宜等亦有前來支持。穿上黑白西裝的安仔甫登場即跳唱《以青春之名》炒熱氣氛，令全場觀眾迅即High爆，安仔跳唱期間更使出「V字馬」，隨後他又跟台下好友林子峰猜包剪揼，場面搞笑。

演唱會中段，安仔在唱出為紀念爸爸而寫的新歌《梨子》前，指雖然時間在一直流動，但仍有不少事情是可以是永遠存在、掛念，是心裏的象牙白：「然後引領你繼續向前行，今年係我爸爸離開我第20年，諗番細個睇住佢㓟梨，佢好鍾意一把刀，然後一條過切切切，係唔斷嘅，佢覺得好好玩，係佢嘅生活情趣。」

他表示小時候也有模仿爸爸，發現原來自己有些價值觀或行為也被潛移默化。唱過《梨子》後，他再唱出寫給媽媽的《愛的一種練習》，送給兩晚都有捧場的媽媽。在唱出《流星劃過富士山》時，台上螢幕播出安仔跟歌迷的合照，當中亦有C AllStar的合照。安仔表示本月9日是自己單飛7周年，今次演唱會對自己來說有特別義意。之後當唱出孫燕姿的《克卜勒》前，他表示頭場唱完後發現有人誤會是「吉卜力」，笑指《吉卜力》是馮允謙的歌曲，對方下星期也會在相同場地開騷。

來到Encore環節，安仔先後唱出《如果世外見》、《煉獄健身室》及《重生》，在唱過《重生》後他即在台上爆喊，感觸說：「好正呀！可以喊喇！多謝每一位入場，好多謝所有人成就呢個演唱會，好開心，尋日好傷心，好正呀，多謝晒！」隨即將手上毛巾掉到台下送給歌迷。

安仔完騷後受訪，坦言雖已在演唱會前做了很多準備，但仍敵不過天氣轉變，他説：「4號突然喉嚨痛、鼻腔發炎到依家，上台前一刻仲有食藥，琴晚頭場唱到中段，把聲突然失控唱唔到假音。」他直言在唱到送給爸爸的《梨子》時神奇的事發生了，聲音漸漸恢復，笑言或許是爸爸保佑，他續説：「仲有個好感動嘅位係唱《好好掛住》時，自己知道唱唔到叫大家幫手唱，大家好似感覺到我把聲出咗事咁好用力唱！」他坦言事後十分自責至不能入睡：「直程嚇親，唱到一半把聲冇咗，心入面講晒粗口，仲有半個鐘我點唱？我之後睇到個留言，我好多謝佢，因為我不停調整我唱嘅方法，原來佢哋睇到，話好欣賞我呢個運動員精神，所以我頭先喺台上面話好多謝佢哋嘅留言，係畀到力量我。」他自爆事前一直瞞住媽媽自己的不適情況，媽媽直至來睇騷才知道，事後媽媽也傳訊息給他表示覺得很心痛，因此再多來一晚支持自己，提到媽媽在頭場落淚，安仔覺得她應該是聽到自己送給爸爸和她的歌被感動。

談到他演出時又唱又跳兼擘「V字馬」，安仔笑指這動作叫「落7」：「配合返我單飛7周年，同埋我兩年前曾經斷過十字韌帶，上次做呢個動作已經係2021年，相隔5年再做返，就連物理治療師睇到都覺得好欣慰！」他坦言經過這兩天恍如經歷了重生一樣，感覺百感交集，故完場時已忍不住爆喊，問到是否希望快點再開騷？他笑指現在只想快點慶功：「忍口好耐，再加上病，唯一慶幸係因為食得清淡所以皮膚白滑咗，哈哈！」他透露會先放大約10天假期充充電，問到單飛至今已7年是時候重組C AllStar？他坦言未有此計劃，大家仍先各自飛一段時間，當然仍會互相支持，並感激3位好兄弟也有前來看騷支持。

東網網站 : https://on.cc/東網Facebook專頁 : https://www.facebook.com/onccnews/