東方日報C1：羅子溢但求有得揀　傅嘉莉入5強當贏

無綫小生羅子溢及花旦傅嘉莉，近年於劇集演出獲得肯定，今年更分別成為視帝、視后大熱人選。今次與勁敵黃宗澤拗手瓜爭獎，子溢坦言平常心，抱緊宗旨「勝不驕敗不餒」，形容得獎與否也是最好的安排。而傅嘉莉迎戰人見人愛的「Man姐」佘詩曼，揚言已打定輸數，笑言目標打入5強！

入行20年的羅子溢憑主演台慶劇《金式森林》進入事業發展新一章，並入圍角逐《萬千星輝頒獎典禮2025》「最佳男主角」。劇中扮演足智多謀家辦的他被形容成「現代版諸葛亮」，令觀眾留下深刻印象。談到近日人氣高企兼有機會衝擊視帝寶座，他謙稱：「可能大家覺得我呢幾年喺處理角色方面唔再橫衝直撞，所以畀多啲認同我啫！好多嘢都係累積番嚟嘅，冇可能一步登天。」

去年憑劇集《婚後事》角逐視帝大熱倒灶，不少劇迷戥他不值，子溢未有氣餒：「我重睇《婚》劇覺得演出有唔少沙石，可以再好啲，都冇話抵唔抵嘅，總之我覺得今次唔得咪下次再嚟囉，始終有日會得嘅，一切有最好嘅安排！」他又直言當初接演《金》劇，根本從未想過向獎項出發：「拍嘅時候都唔知幾時出街㗎，好彩觀眾喜歡。可能做咗爸爸睇嘢成熟咗，覺得角色無論戲份多寡，努力演好就得，好似我同時憑《執法者們》入圍男配角，我好鍾意呢個角色，好完整兼且有內心戲發揮，演得好過癮㗎！」

拍攝艱苦 磨平稜角

對於被指是視帝大熱，子溢坦言：「信心要有，但勝不驕敗不餒。（依家名同利邊樣重要啲？）有名就有利啦！總之要好好把握每個機會，為他朝『有得揀』鋪路，依家嘅我仲未有得揀。（點解？）我唔係單身，亦唔夠膽量，好似曾經諗過想做生意，開間健身室發展所長，衡量過後都唔敢冒險。依家嘅我唔求一步登天，但求多勞多得。」拍電影出身的他希望早日「回歸」影壇，實行影視雙線發展，又自爆以往性急，直至拍電影《西遊記之孫悟空三打白骨精》經歷了艱苦的拍攝過程，徹底被磨平了稜角，完全扭轉其視野觀感，如今耐性及心態都很正面。

至於上屆摘下「最佳女配角」的傅嘉莉（Kelly），今次憑《刑偵12》升呢角逐「最佳女主角」，跟「三料視后」佘詩曼拗手瓜。對於能與阿佘較量，她表示已算對自己有所交代，頒獎禮當晚公布5強如果有自己的名字，已經當贏！她笑言對得獎打定輸數，反而對阿佘充滿信心：「我本身好鍾意《新聞女王2》，第一季已經好鍾意Man姐，今年我都繼續投票畀佢。（如果最後係你攞呢？）咁公司想我點就點，乜都得！」

Kelly透露今次入圍角逐視后，最感激劇集監製鍾澍佳：「多謝佢安排一個咁好嘅角色畀我去演，係我從演以來最喜歡嘅角色。」她又指今次開工，最開心是有機會跟兩位拍檔林保怡及張振朗合作，尤其當知道與前者有大量對手戲時，更覺像中了六合彩頭獎般興奮：「佢喺我心目中係影帝級，喺佢身上學到好多嘢。最深刻係結局嗰場戲，大家拍完都呆咗，覺得太正，係因為佢而產生咁大嘅火花。」

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/