雲浩影「下凡」獲偶遇　仙氣食米線仲幫路人埋單

樂壇「仙氣女神」雲浩影（Cloud）以親民貼地、傻大姐個性入屋，加上靚樣有保證，依家已經係歌壇數一數二女神。佢亦一向以鍾愛食米線聞名，曾擔任米線店代言人，生日又收米線造型蛋糕，就連個人通訊帳戶名都係「最愛食米線」。近日，就有網民在尖沙咀米線店偶遇Cloud，於搭枱時發現坐對面嘅竟然係女神！

該網民透露自己被女神仙氣迷得一陣陣，又同對方傾偈，最後Cloud更為佢埋單，冧爆留言：「唔識畀反應之餘繼續扮冇嘢落單叫嘢食，直到同枱同附近人走咗冇咩人先同cloud講嘢，超Nice 主動同我傾咗一陣偈。Cloud中途食飽走先，過咗一陣個姨姨話幫我埋咗張單🥹OMG！仙氣女神坐喺自己對面仲可以同佢傾偈！有同佢講好鍾意聽回憶半分鐘🤣」令網友羨慕不已。

對方又公開女神食米線口味，透露自己同Cloud巧合地點咗腩肉、螺旋藻：「小窩米線，小辣，少米多芽菜，再加辣椒醬，凍檸茶少甜少冰。」Cloud本人亦特意在貼文留言親證事件：「本人喺度」，睇嚟一班粉絲又可以get「同款」喇。

東網網站 : https://on.cc/東網Facebook專頁 : https://www.facebook.com/onccnews/