台慶頒獎禮︱佘詩曼封后似發夢　唔心急開《女王3》

出爐雙料「視后」佘詩曼在無綫台慶頒獎禮破紀錄4度登上視后寶座，台上流下喜悅眼淚，相當開心。得獎後她接受訪問講到第4次封后，她說：「好似發緊夢咁，真係唔知講咩，好多謝fans支持，冇佢哋嘅支持就冇《新聞女王2》，亦都要好多謝我自己咁多年嘅努力，亦都會繼續努力做多啲好作品出嚟，希望作品能帶出正能量。（開拍《新聞女王3》？）真係唔知，大家都覺得係要雕琢吓劇本先，睇吓諗唔諗到新嘅方向，都係睇劇本，唔係為開而開，唔急嘅，冇話幾時要開，要小心處理，唔好拍到爛，希望保留美好回憶。當然打破梗係好事，但唔係咁容易，編劇要諗新橋，真係需要時間。」

講到《新2》在頒獎禮中橫掃各大獎項，成為大贏家？阿佘說：「係好開心嘅夜晚，特別戥何廣沛、王敏奕開心，見到大家進步好大，同第一輯好唔同，第二輯大家好有信心為角色添加新元素，係好好嘅事情。」講到獎勵自己，她覺得獎項已經是最好的獎勵。對於黃宗澤打算請吃「全奶宴」慶功，她則笑說：「我都唔飲奶嘅，即係唔預我啦，同佢未好番㗎，我唔鍾意Kingston㗎。其實就好戥佢開心，攞雙料視帝，佢都努力咗好多年，演員遇到合適嘅角色，天時、地利、人和係好難得嘅一作事。（帶旺Bosco？）唔好咁講，係佢自己嘅努力，其實我同佢唔係好多對手戲，係佢自己叻。」

講到曾志偉宣布卸任TVB總經理（節目內容營運），阿佘坦言不感到驚訝，而她的好姊妹周家蔚、湯盈盈、梁靖琪也有到來祝賀，是否早已得悉？她說：「都係呢兩三日先知，佢哋都好保密，大家都成日叫佢唔好咁忙，其實係好辛苦，佢之前身體唔舒服，我哋都心痛，但都係佢自己嘅決定。（有冇興趣做行政工作？）冇，人哋講多兩講我就乜都好，咁唔掂，我唔係高層嘅材料。」

東網網站 : https://on.cc/東網Facebook專頁 : https://www.facebook.com/onccnews/