蔡依林「大蛇騷」恐唔過內地審批　網友呼籲唔好入場

台灣天后蔡依林（Jolin）《PLEASURE》世界巡迴演唱會由尋晚（30日）起一連3日在台北大巨蛋舉行，為隆重其事，Jolin豪砸9億新台幣（約2.2億港元），將現場打造成「愉悅宇宙」，大批大型道具呈現出「萬獸派對」，包括巨型公牛、大蛇、飛馬、金豬、蝴蝶海馬、長頸馴鹿、象鼻魚等20隻奇幻混種動物傾巢而出。當中以Jolin將巨蟒當坐騎繞場大周嘅演出引發全網驚呼，惟觀眾反應不一，成正反兩極評價爭議。

唔少觀眾完場後都表示睇到毛管戙、起雞皮，更有之後買咗飛嘅網友話唔敢入場睇，部分觀眾恐蛇，認為Jolin踩巨蟒演出已造成觀眾不適。有網友公開呼籲大眾唔好入場，指感受到「超恐怖的磁場」、「地獄來的能量」，有人更指睇到演唱會後第一反應係覺得「黑暗、恐怖、壓抑」，令人不安，更直指似足「葬禮邪教儀式」，牛鬼蛇神樣樣有，並多人稱咁嘅能量場會吸走大量現場觀眾氣運，力指磁場不對。

至於力撐Jolin嘅網友，就幫口解釋今次Jolin嘅舞台策劃係想帶出「七宗罪」主題，自然少不了加入形象化動物道具以豐富效果，讓人引為警惕，同時道具、服裝等都係視覺延伸，似足大型巡遊Party，大家唔使過度解讀。同時又為今次舞台疑似抄襲作解釋，因有人質疑今次舞台呈現同2016年美國天后Katy Perry穿上火燄短裙為美式足球賽事《超級碗》（Super Bowl）表演非常相似，Katy Perry於9年前演出時企喺巨型獅子像上高歌，與今次Jolin嘅表演如出一轍，原來二人係用上同一個團隊，而非抄襲。

除此之外，網友同時質疑今次表演道具費係咪需要用上9億元，又質疑是此演員會會否向政府收取經濟資助。有網友就表示Super Bowl中場騷預算通常於1到2億，表演大概12-15分鐘左右，蔡依林今次係3個小時9億，數字部分大家可以自行參考。

另外，《PLEASURE》演唱會預計2026年3月7日首度於內地巡演，第一站係深圳，緊接係廈門，不過已有觀眾憂心審批限制，部分網友認為，場館舞台可能會影響台版舞台裝置，無法原汁原味呈現，甚至憂心「巨蟒巡遊」、「懸空劍台」等環節會遭刪減，內地巡演能否與台版相同亦成為討論焦點。

東網網站 : https://on.cc/東網Facebook專頁 : https://www.facebook.com/onccnews/