陳山聰坦言票房有壓力　幸好囝囝考獲心儀小學

視帝陳山聰近日轉跑道，夥拍好兄弟林盛斌（Bob）及梁烈唯合演馬來西亞賀歲片《媽媽又要嫁》。隨着上映日子逼近，電影公司近日發放多條預告片宣傳，其中一條片只見山聰與Bob因服飾問題而吵架，兩人愈吵愈兇，更連聲「老母」，各不相讓！

問到現實生活中兩人可試過一言不合，山聰笑答：「冇喎，絕對唔會，咁多年兄弟嘞，所有嘢有商有量，大家都知道彼此嘅脾性，人與人之間都係互相遷就嘅啫。」他又打趣以對方為目標：「佢周身咁多張刀，想好似佢咁有錢，哈哈！」山聰形容這部賀歲片等同他們3兄弟的「生意試金石」，自然重視非常，故一定會好好利用網上流量宣傳，且不諱言今次票房上有一定的壓力，希望一切順順利利。

另外，山聰囝囝Jaco已考獲心儀小學入學名額，9月正式成為「小學雞」，令山聰放下心頭大石：「我同太太真係好感恩，安排到佢入讀呢間本地傳統小學，覺得係緣分嚟。我個仔聰明但奀皮，需要人管吓佢，希望佢喺學校學識規矩，呢啲好緊要。」他又坦言自己與太太也不是「讀書人」，故只希望囝囝日後發展興趣及學有所成：「佢本身比較鍾意藝術，不過條路佢自己揀啦，我同佢媽咪只係負責支持佢。」

東網網站 : https://on.cc/東網Facebook專頁 : https://www.facebook.com/onccnews/