「黃金32C」陳瀅勁性感　李海銅獲封李佳芯2.０

藝人陳瀅近期由舞台演出到無綫劇集《臥底嬌娃》分別與蔡潔及李海銅皆大玩She She情。陳瀅與蔡潔將到澳門為《Pillow Talk》演出，陳瀅在海報中成為性感擔當，以金色低胸裙示人，相當吸睛，拍攝時她們拿着枕頭嬉戲互打，又擺出姿態撩人甫士，相當有默契。

陳瀅與蔡潔皆期待今次在舞台上的合作，蔡潔說：「我同陳瀅同公司咁耐，亦都試過同劇好多次，但我哋嘅對手戲次次都好少，一直都好期待喺戲劇上可以合作多啲，冇諗過我哋第一次嘅深度合作係喺一個Show上面。」陳瀅說：「我覺得成個Concept對我哋嚟講係好新穎，都幾Excited，今次好開心同蔡潔一齊，因為我同佢喺舞台上都冇乜經驗。」蔡潔則補充笑說：「陳瀅你可以自信啲，唔係冇乜，係冇經驗，我就做過一次演唱會嘉賓。」

陳瀅與蔡潔收到開騷邀請後，已經和製作團隊構思了很多不同環節，有表演、有互動遊戲、也希望能有嘉賓，望帶給現場觀眾更多驚喜，蔡潔說：「我嘅歌單已經諗咗好耐，希望可以透過歌曲講多啲故事畀大家聽，不過如果大家有睇我2013年華姐，就知道跳舞一定唔會係我負責。」成為跳舞擔當的陳瀅則說：「幸好《臥底嬌娃》有少少打底，跳舞應該可以處理到。」

此外，陳瀅在無綫劇集《臥底嬌娃》中得到有「藝訓班班花」之稱的李海銅無微不至照顧，網民視李海銅和陳瀅是潛力she she CP。但近日劇情一轉，講到李海銅因故突然死亡，令網民相當不捨。劇中李海銅對陳瀅無微不至，戲外則反過來陳瀅對李海銅照顧有加。

新人李海銅指拍攝時相當緊張，多得陳瀅提醒放鬆，又相當有耐對戲，十分感激她：「好記得第一日同佢喺廠拍攝放晚飯，佢特登同我一齊去canteen食飯，大家傾偈互相認識。有一場有好多對白要講，可能我講得太快，節奏有啲奇怪，自己又緊張，但阿瀅超好，捉住我手臂話慢慢嚟唔好急，叫我諗多啲平時同好朋友傾偈係點。」

在劇中有不堪回首過去的陳瀅，遭前僱主要求拍下賣弄身材的影片，其「黃金32C」畫面近日播出，相當吸睛。被陳瀅笑指為全劇最性感的這一幕，播出後在網民回響，網民大讚她愈來愈靚外，陳瀅強忍喪友傷痛，含淚與上司黃子雄對話一幕，亦展現了日趨成熟的喊功，演技得到認同。

東網網站 : https://on.cc/東網Facebook專頁 : https://www.facebook.com/onccnews/