Yanny澳洲嫁陳考威星光熠熠　余文樂Ian AK晒冷見證

前Super Girls成員陳穎欣（Yanny）將與音樂監製陳考威（Gareth Chan）於澳洲舉行婚禮，二人日前已抵達悉尼，將放足3個星期假嘅二人，叫埋大批圈中好友見證幸福，今日聚首出席婚禮，令悉尼忽然星光熠熠。與陳考威份屬老友嘅余文樂，今次梗係有份出席，畀網友見識樂壇「三代同堂」一刻！

Super Girls前成員蔡明思（Jessica）及吳嘉禧（Cheronna）為Yanny擔任姊妹，造就Super Girls三位成員婚禮上再度合體。見Yanny已着上中式紅色打底衫，一身姊妹裙嘅Jessica、Cheronna在旁為新娘Yanny換上裙褂，即婚禮有加入傳統儀式。而Jessica亦分享今次為酒莊婚禮。

繼上次MIRROR成員Anson Kong（AK）上載同一對新人睇樹熊後，日前余文樂亦有分享合照，有填詞人黃偉文（Wyman）及MIRROR另一成員陳卓賢（Ian）現身，余文樂仲大爆飯局食咗長達5小時。當年余文樂與台灣「皮帶大王」千金王棠芸結婚，陳考威都有帶埋Yanny出席，兄弟情已經唔使講。

近日有「社交網管理員」之稱嘅吳肇軒，日前都有透露出發去澳洲觀禮，打趣留言：「就快要坐七八個鐘長途機，我唔捨得呢兩日嘅Posts。」古天樂即留言：「麻煩管理員幫我恭喜一對新人！」吳肇軒入晒戲回覆：「好！交畀我啦！項太傅」據知，陳考威與Yanny澳洲婚禮只邀請小量親友出席，未有打算返港補儀式，由於Yanny婚後要開工，因此蜜月之旅預計要拖到2027年。

東網網站 : https://on.cc/東網Facebook專頁 : https://www.facebook.com/onccnews/