Edan動員全家睇戲捧場　硬Sell自己是金多寶

男團MIRROR成員呂爵安（Edan）近日四出為其有份演出的賀歲片《金多寶》宣傳，雖然忙於工作，但他不忘趁春節假期陪家人。Edan近日在社交網上載跟家人食團年飯的相片，身穿紅噹噹的他除了跟最錫的妹妹「小如豬」合照外，又晒出跟嫲嫲的相片，並表示：「雖然我唔似天晴（鍾雪瑩在電影《金多寶》的角色名），唔係嫲嫲湊大，但爺爺嫲嫲由細到大都好錫我，細細個就成日都塞錢畀我，依家就日都要開電視睇我嘅節目、表演。前幾日入嫲嫲房，先知道佢原來一路有擺我細個張相喺床頭，仲有張手幅添。雖然我冇天晴同嫲嫲咁Close，但我我有樣嘢同天晴一樣，就係我哋都係嫲嫲嘅《金多寶》!」晒溫情之餘又乘機宣傳電影，一舉兩得。

Edan亦有甫出嫲嫲床頭所珍藏Edan小時候的照片，當年的他年紀小小已經戴眼鏡，樣子精靈，跟現在分別不大。此外，他又晒出日前年廿九，全家上下齊到戲院睇戲捧他場的合照，還指自己與妹妹及爸爸已是二刷，認真有愛。

東網網站 : https://on.cc/東網Facebook專頁 : https://www.facebook.com/onccnews/