193再被缺席活動　ERROR粉絲暴躁群起罷去支持

男圑ERROR成員193（郭嘉駿）近月鮮有現身公司活動或參與拍攝，被傳遭雪藏嘅佢，早前補祝36歲粉絲生日會時更即場爆喊，令在場約300名粉絲心都痛埋。點知聽日（31日）於愉景灣舉行嘅跑步活動，原定活動大使有COLLAR成員Candy及Ivy So、Edan（呂爵安）及ERROR 作招來，報名費最貴$780，最平$380，然而活動舉行在即，有404（ERROR粉絲名)於社交網揭露原來193冇份出席。

有已報名嘅粉絲網上大鬧：「404係想見ERROR 4個人齊人，想講404唔止香港Fans，有404專程買機票飛過嚟香港」、「ERROR依家已經唔再係放養天團 已經跌咗一級變咗做棄養天團 我今個禮拜六唔會去愉景灣，參加係想見到四子齊人，依家三缺一，我要見佢哋『四歸一』」網民續質疑193被公司雪藏，譏諷ViuTV唔可以講公司壞話，皆因早前193指控經理人亂發言，在未有通告嘅情況下畀另一成員保錡頂替其主持工作，粉絲力撐193只係想表達全面嘅情況畀大家知，亦有網友持相反意見，指193句嘢過分咗。

當中有唔少參加者要求退款，向大會發送訊息表明只想見ERROR四子，而非三缺一，及後大會回覆未能退款：「很抱歉，193未能出席是次活動。由於活動嘉賓之安排，大會保留最終決定權，因此嘉賓名單有可能因應情況而有所改動，不便之處，敬請原諒！」

其實193與公司逐漸交惡有迹可尋，早前假澳門演出公司跨年騷，193疑不滿ERROR僅唱兩首歌及冇得唱solo歌；193缺席《全民造星VI》總決賽事件，翌日又炮轟經理人阿濟，自此193疑被公司掟入雪櫃，連有份參與嘅新節目《骰界》記者會都被缺席。

日前193於生日派對上就自責任性衝動，傷害痛錫自己嘅人：「最衰就係冇機會，同嗰啲我覺得需要道歉嘅人道歉，怕尷尬。我同阿Dee（何啟華）約出嚟，傾咗六七個鐘，傾到天光，我同佢講，有啲嘢我傷害咗人，我想同佢講（對唔住）。隊友話，你係要講喇，如果唔係你唔知幾時講，可能你瓜咗或者佢瓜咗呢？第時講唔出㗎喇！心結一世㗎！」巧合地，Dee哥前日（28日）貼神奇四俠短片，疑寓意ERROR「我們不碎」，193亦於限時動態貼同Dee飯敍相，留言：「love my bros」。

東網網站 : https://on.cc/東網Facebook專頁 : https://www.facebook.com/onccnews/