叱咤︱Gin Lee冧莊歌后　馮允謙打破宿命首封男金

《2025年度叱咤樂壇流行榜頒獎典禮》個人獎項方面，「叱咤樂壇組合」銅獎是再度上台拎獎的The Hertz，他們表示：「多謝粉絲，我哋去到外地做騷，係無人聽得明我哋唱乜，因為我哋堅持唱廣東歌，我哋會繼續唱我哋嘅語言。」銀獎由成軍15年的Pandora奪得，獲首個叱咤組合獎的3人成員表示：「我哋好想喊」。金獎由大熱的COLLAR奪得，首次得組合金獎的COLLAR在台上多謝公司、家人、粉絲及幕後人，隊長Gao更一度情緒激動，哽咽說：「呢個獎唔係只屬於COLLAR，係陪COLLAR走到今日嘅人，我哋會做多啲好嘅作品報答你哋。」

「萬年阿二」馮允謙（Jay）登上叱咤男歌手金獎，是他首個男歌手金獎，他上台時表現感動又激動，全程眼濕濕，他坦言：「其實我好驚，唔知大家有咩反應。」全場即時鼓掌以鼓勵他，他續說：「我入行以來今次第一次攞金獎，而我知道呢個獎唔係一年嘅努力，而係咁多年累積，我想多謝自己，我好多年前曾經想放音樂，我自己一直暱埋寫歌，終於有公司畀機會我，令我可以踏上台唱歌畀大家聽，佢哋簽我嘅時候都有啲質疑，因為當時我個樣腫又爆牙，我對自己都冇信心，但公司依然相信我，我永遠都唔會忘記。」他又多謝粉絲及家人。

至於陳柏宇（Jason）獲叱咤男歌手銅獎，他上到台即時大叫發洩，他表示：「今年年頭做咗一件從未做過嘅事，就係話畀大家知我想攞獎，唔係因為我今年突然對自己好有信心，而係因為我同事對我有信心，佢哋瘋狂咁認為我仍然能夠上台攞男歌手獎，我由細到大都唔係一個好識為自己爭取嘅人，好在有班好同事畀信心同熱血我，令我可以企上台接受呢個獎。」他多謝公司、同事及粉絲，他坦言：「好少多謝粉絲，我成日唔記得，多謝你哋今年好出力為我拉票，出力到我都去旺角同大家一齊拉票，雖然好尷尬但好開心，多謝所有投過我票嘅所有人，下年我會再講多次。」

英皇歌手李幸倪（Gin Lee）以大熱姿態冧莊成為叱咤女歌手金獎，她上台時深深呼出一口氣，她稱今年時間過得特別快，快到沒有時間好好沈澱自己：「今年我推出咗一隻碟同5首歌，好多時間陪一年青人去追夢，係好開心同有意義，喺呢個年代做歌手要有十八般武藝同好強大嘅心臟，令我一直堅持下去，係因為我相信生命可以影響生命，音樂可以令世界變得美好，呢兩個信念令我可以企上台攞到兩個獎。」她又感謝公司、同事、老闆、每位合作過的音樂人、家人及愛貓，還有粉絲對她的不離不棄：「多謝每我覺得我值得、可愛、投票畀我嘅你你你，我想將呢個獎分享畀每一位迷失緊掙扎緊嘅你，努力嘅人係唔會輸，我哋一齊努力，專注自己跑道，一直進步終會去到你想去嘅地方，我好愛你哋。」

至於女歌手銅獎由陳凱詠奪得，她上台時興奮得大叫，她說：「我覺得今年攞到呢個獎係好驚，因為有啲意外，啲人成日話我好曳、唔聽人講嘢，但唔係我都聽人講，只係我有時有啲任性同硬頸，因為我覺得音樂唔係數字，而係好真實嘅表達，所我好畀心做一隻我好驕傲嘅大碟，用晒我嘅力氣，有時我都好質疑自己，我會諗我憑乜去開紅館騷，獨立歌手係有啲孤單，我未必係任性同唔聽話，只係盲目樂觀，相信自己做自己相信嘅嘢就夠，好幸運有唔同嘅獎勵同支持，好多人同我講你得架，你哋少少嘅鼓舞令我有氣力行落去，多謝你哋嘅鼓勵。」另外，主持森美宣布女歌手獎之前特意多謝炎明熹（GiGi），此時鏡頭影向Gigi，她略帶怕醜地對鏡頭打招呼。

東網網站 : https://on.cc/東網Facebook專頁 : https://www.facebook.com/onccnews/