【方以文專欄】TVB《鐵探》第一集隔夜短評：Benz雄穩住戲味

讚：記得歐陽震華喺訪問裡面講過，話同Benz雄同場要打醒十二分精神，因為佢成日笑笑口，但啲戲食咗你都唔知。我詮釋呢句說話做「輕輕鬆鬆但戲味又好出」，第一集Benz嘅戲完完全全體現到Bobby所講嘅嘢：有戲到但又唔過火。喺呢套戲個個都氣勢外露嘅時候，Benz嘅演繹方法就更加出。第一集預咗佢推啲人出嚟舖線，靠動作戲去加返強可觀性，但今集Benz雄出現嘅位係好睇過啲追逐戲，冇乜畀時間佢都可以一嚟就去到，為第一集加返好多分數。

另外，唯唯同埋王君馨同袁偉豪係夾嘅，佢哋同場嘅位真係幾好睇。唯唯做呢啲嬉皮笑臉角色係專業戶咁濟。

舖咗咁多線，唔知大家消唔消化到。我就好啲，因為喺記招睇咗18分鐘嘅先導版。不過亦都因為咁，第一集好多位展示人物關係，我都覺得冇乜感覺。

彈：拍槍戰飛車追逐真係好鬼難，除咗台前幕後都要準確之外，對各位嘅體能都係個挑戰，部分更加只可以一take過，冇得再嚟過。製作團隊強調想拍返港產警匪片陣味，可能係佢講到咁，我嘅期望就高咗，睇今集就有輕輕失望。有好多位都可以拍得靚啲，兩車駁火冇乜緊張氣氛。落車喺鬧巿追逐啲鏡頭成日拎wide shot，冇乜迫力。

另外，鋅sir穿過玻璃嗰度，四圍都冇乜嘢阻住追賊，冇營造到條街好多人，搞到佢撞穿玻璃有啲多餘（袁偉豪親身上陣）。想重現港產片警匪追逐係好嘅，但正如製作團隊喺記招所講，警匪片係香港片種當中好出色嘅一瓣，係好多香港人由細睇到大嘅一個片種，真係要度得細心啲突破啲，香港觀眾先會覺得超正。嗰啲慢鏡幾次多角度拍反車爆炸就真係唔好用咁多喇……

反而畀多啲時間空位剪接好啲，依家part part個節奏都一樣，係快，但有好多位都唔夠力，好似係蔡思貝扮overdose脫身、王君馨喺酒吧同袁偉豪講個女、楊明同袁偉豪喺後巷對峙、紅姐同benz喺office互窒，全部都應該係好睇嘅位，可惜好快就走咗。一味求快，只會變成冇節奏。

【演員表】惠英紅 飾 萬晞華 / 袁偉豪 飾 尚垶 / 姜浩文 飾 游秉高 / 蔡思貝 飾 招喜悅 / 王君馨 飾 楊曉怡 / 許紹雄 飾 簡國曙 / 楊明 飾 邱勵傑 / 梁競徽 飾 谷永正 / 謝東閔 飾 陳國城 / 余德丞 飾 莫世超 / 張寶兒 飾 程美茵 / 潘姿善 飾 尚晴

撰文：方以文（ig: fongemantvman）