江玉歡卸任議員後多了乘巴士　感覺「落咗凡間」｜Ray Online

江玉歡卸任議員後多了乘巴士，感覺「落咗凡間」

江玉歡卸任立法會議員之後有新崗位，擔任商台節目《又係時候同一天講再見》嘅主持。佢喺節目中分享而家多咗搭巴士同港鐵，亦落地行多咗，感覺自己好似落咗凡間。

江玉歡留意到不時有市民話議員離地，佢話呢幾個星期卸任之後，成日搭港鐵去金鐘海富中心返工，隔住條天橋望過去立法會同政府總部，有一種特別嘅感覺，開始明白點解有時政府或者議員會同市民有啲距離。佢回想做議員嗰陣有司機車出車入，好少行過去橋嘅另一邊，望吓市民做緊啲咩。佢認同官員、議員諗嘢可以貼地一啲，例如新一屆議員可以多啲走過條橋，了解市民所需。