楊明被問婚期指「今年好大機會」　莊思明：成日講咁多廢話

藝人林正峰、莊思明與男友楊明、黎燕珊、周志康及無綫高層樂易玲等，晚上（7日）出席盆菜活動，為大埔宏福苑大火受災居民送暖。

莊思明透露身邊有朋友的家人不幸於宏福苑火災罹難，坦言剛收到消息時也不敢聯絡對方，認為大家也應給予空間和時間讓對方調整心情：「因為件事太突然，一夜之間好似失去咗好多嘢，唔敢打攪佢太多，不過佢知有好多人支持緊佢，我覺得個傷痛唔會減輕，等佢慢慢平復返，再振作先再同佢傾多啲偈。」她坦言當爸爸離世時自己也試過不想見人，因此明白朋友為何想收起自己：「你唔想每見一個人又再去講一次，不斷挖傷口同傷痛，我會容許自己喺間房度發洩情緒，一定需要發洩，因為屈住屈住唔知幾時承受唔到，到之後覺得自己可以見返朋友同親戚，就去搵人傾偈。」楊明亦希望災民可以透過相關機構或找朋友傾訴讓自己心情平復，坦言自己也會遇到不開心的時候，幸好本身性格開朗，亦明白世上有很多人比自己更慘：「人生有開心有唔開心，唔可以將唔開心留喺身上太耐，我會搵一啲令自己開心嘅嘢做，例如打籃球、游水同見朋友，對我嚟講可能會分擔到一啲負面情緒，係個好有效嘅方法。」

談到農曆年，莊思明透露男友楊明會先陪她返馬來西亞探家人，之後楊明會先返港繼而再到惠州探望親，自己隨後便會到惠州探對方家人。問到二人婚期？楊明即表示有消息會第一時間會通知大家。提到莊思敏笑指自己已結了兩次婚，但妹妹莊思明還未嫁，莊思明說：「咪由得佢笑囉，佢依家叻吖嘛，用次數嚟計佢幾叻呀！唔夠佢叻呀，我輸咗，哈哈！」楊明則表示會盡快，笑稱「今年好大機會」，莊思明即揶揄他所講的話似曾相識。問到打算在哪裏舉行婚禮？她説：「應該會喺香港，因為自己喺呢度出世，朋友同親戚都喺呢度，馬來西亞嗰邊會一切從簡。」楊明也表示因為親戚朋友也在這裏，故應會在香港舉行。追問他們最重要的是婚期，莊思明即投訴說：「係囉！講咁多呢啲嘢冇用，成日講咁多廢話。（影婚紗相未？）梗係未啦！相都未影一張。」談到情人節將至，楊明表示已有準備，又笑指很多人已知道他早已準備好求婚戒指，只差在未給莊思明，莊思明即笑謂：「淨係畀咗個盒我。」楊明即搞笑表示因希望給女友驚喜，故需要待事情丟淡之後才送。

久未出席活動的林正峰，表示剛從寧波出席品牌活動後回港，順道也見見當地粉絲。談到他早前挑戰自己，五天共拍了65集短劇，他笑指自己也覺得很厲害：「一日拍20場戲，高密度之餘每場戲都非常多對白，而且全普通話，係一次非常開心嘅磨練，過完嗰幾天就好似過咗幾年咁，哈哈！」他直言今次機會讓他成長了不少，透露事前做足準備功夫，除了查好拼音和找人教他讀出之外，亦需要熟讀劇本，拍攝前2、3小時再以普通話背一次，情願犧牲睡眠時間：「每晚收工可能2、3點，我要6點起身去做準備，因為我唔想影衰公司、唔想影衰自己。」他笑指刻意因模仿北方捲脷口音，再加上自己的「港普」結果令其他演員發笑。問到拍短劇跟長劇比較那種較辛苦？他說：「各有各辛苦，拍短劇好密集，要花好多精神去記對白，同埋短劇需要誇張，長劇就需要慢慢提升情緒，要好細緻，短劇一嚟就要爆喊、發嬲，對我嚟講係挑戰同有啲衝擊，各有挑戰。」問到之後是否會多留在港？他表示要看公司安排，不會局限自己：「邊度有機會就盡力爭取，依家市道唔好，會盡量珍惜每個機會。」

另提到鍾澍佳打算開拍《許詩晴傳》，問到飾演許詩晴老公王偉的林正峰會否參與？他說：「未有消息。（你對許詩晴嚟講好緊要！）身份上面係，我見有好多網民都希望王偉再出現返，我都好期待睇吓乜嘢情況、乜嘢時候同劇情會再出現返，但其實有冇我都唔會特別去諗，有冇嘢做我都會盡量去增值自己，盡量提升自己。」

東網網站 : https://on.cc/東網Facebook專頁 : https://www.facebook.com/onccnews/