何沛珈發放正能量　當義工學感恩

藝人何沛珈（Roxanne）向來善心爆棚，不時當義工幫助社會上有需要人士，她昨日網晒靚相，分享跟幾位婆婆一起當義工派新鮮蔬菜的喜悅，寫道：「同幾位婆婆義工一齊分菜，過程雖然忙碌，但充滿歡笑。能夠將新鮮菜，親手交到公公婆婆手上，見到佢哋笑逐顏開，一份簡單的快樂直入心底。每次義工服務中，更多係從長者身上學會感恩同堅韌，一件小事已帶來內心喜悅。佢哋每個月都有上門探訪活動，關愛獨居長者。如果你有興趣不妨一齊親身感受呢份溫暖。」

Roxanne週日才跑完10公里馬拉松賽事，翌日一早便走到街上當義工，她接受東網訪問，笑指跑完真的有點周身痠痛，但仍無阻她做善事的決心，她説：「其實呢個活動係逢初一十五，負責人就會去採購100斤嘅菜，然後就會去派比樂華邨已經登記咗嘅公公婆婆，通常佢哋都係獨居長者，有啲婆婆好有心㗎，佢哋仲會幫手分裝，幫手派。」她表示平日若有空也會到該區探訪長者：「佢哋通常一個月一次上門探訪嘅，但係今次派菜我就係第一次幫手，啲老人家見到有後生嘅嚟幫手佢哋好開心嫁，有時候我就問吓佢哋有啲咩需要、有冇啲咩唔舒服。」

Roxanne覺得當義工除了能幫人，能從中學會感恩是更可貴，她説：「喺老人家身上學到一啲小事就已經可以好快樂，我希望可以透過作為一個幕前人嘅身份去影響多啲人，一齊去做啲義工活動，我唔係出名啦當然，但係可以影響到多一個人就多一個人。」

東網網站 : https://on.cc/東網Facebook專頁 : https://www.facebook.com/onccnews/