宏福苑大火三個月專訪　開窗散濃煙、淋熄棚網火種　85歲冼婆婆逃生記

編按：宏福苑大火至今三個月，聽證會將於 3 月 19 日開始，調查事件成因。《法庭線》訪問倖存者與遺屬，他們訴說大火前後的生活點滴，以及對尋找真相的期望。
2 月初的獨立委員會指示會議，居住宏泰閣、85 歲的冼婆婆與兩名女兒到場旁聽，受訪時憶述被困 9 小時後獲救，在梯間「檻過大公仔」的經過。
死裡逃生，但新裝修的家付諸一炬，冼婆婆與幼女入住過渡性房屋，最近忙於搬遷。農曆新年前，記者跟冼婆婆一家見面，她們談起火災，說仍然歷歷在目。
當日冼婆婆發現走廊佈滿濃煙，果斷關門，她見濃煙沿門縫滲入，想了想決定開風扇和抽油煙機，把煙引出窗外；不久又見窗外的棚網起火，即拿一桶水淋熄。消防員登門時驚訝屋內竟沒煙，向她舉起大拇指。
女兒說，媽媽在危急關頭「好醒」，但其實自救方法「不合理」，「其實講緊（火警時）你要閂好晒啲門窗，封好晒啲地方，佢就開晒屋企嘅窗，有咩抽得出去門口嘅，佢都開晒。」
她說一家人得以逃過一劫，也憑一點運氣，「好彩係風向吹唔到我哋，好彩係我阿媽堅持（裝修）要買呢個防火門。我阿媽有啲嘢嘅堅持，令到我哋今日，成為呢個好彩，我哋先救返一命。」

從土瓜灣天台木屋到宏福苑

冼婆婆以前是水果小販，育有三名女兒，住在土瓜灣的天台木屋，由於丈夫是長期病患，家庭經濟幾乎由她一力承擔。女兒漸長，剛好獲派公屋，冼婆婆不想她們在混雜圈子生活，於是一家五口搬進大埔廣福邨。
本來冼婆婆對於公屋單位心滿意足，但認為女兒已踏入社會，家中經濟穩定，不想再佔用政府資源，便購入宏泰閣中層的單位。早幾年冼婆婆的丈夫去世，次女 June、幼女阿 Dow 為照顧母親，先後與她同住。
退休後，冼婆婆對屋苑管理、財政感好奇，她成為法團管委員司庫，說任內更換升降機零件、LED 燈，都是向政府申請資助，「冇用過業主一個仙。」
至屋苑着手籌備大維修，冼婆婆已不在位，但仍然關心，「我哋近海，其實外牆有咩損失，直接影響裡面嘅鋼筋，所以我知道維修係應該。」她曾就外牆安裝晾衫架一事，與工程顧問「鴻毅」交涉，覺得對方態度堅定，承諾做到相關工程，她認為「應該都信得過」。

宏福苑最終通過 3.3 億元大維修，每戶要攤分十多萬元，外界形容是「天價」。
但冼婆婆當時認為可以接受，她說一方面不知道市價，另一方面建築業人手向來短缺、「人工好貴」，「我有個朋友住俊民苑，喺何文田嗰度，佢哋（大維修）都用咗 11 萬幾，佢哋早我哋成 3、4 年去做。」
加上，當時承辦商「宏業」答應「全包」，冼婆婆說：「佢話搵到啲我哋睇唔到嘅（問題），佢都包嘅，我諗住都穩陣」。後來「宏業」再要求法團支付油漆、其他項目費用，種種跡象令她起疑，但認為自己沒有專業知識跟進，「我又唔係工程師，又唔係建築行業嘅人。」
阿 Dow 則說，大維修期間住戶要拆冷氣機、長時間關窗，在家晾衫也要長開抽氣扇、空氣清新機、抽濕機，加劇了敏感，身體亦變差，「但我理解嘅，始終維修呢件事，都係我哋嘅本分。」

家園燒毀

適逢屋苑大維修，冼婆婆又見女兒睡房的牆壁物料剝落兼有漏水，決定花百萬裝修單位，新置雲石牆、木色傢俬，待屋苑工程亦完成，就迎來安樂窩——
直至 11 月 26 日的大火燒毀一切。

冼婆婆當日獨自在家，正收拾物品前往回收，一打開大門發現走廊滿佈黑煙，她隨即關門，馬上用濕毛巾掩口鼻，又用另一條濕毛巾塞住門底的空隙，準備擔凳把門頂的縫都封住，「諗諗吓唔得喎，萬一跌落嚟咪冇得救？」改為開窗、抽油煙機、風扇，想將黑煙引出窗外。

不久，從走廊進來的一團團黑煙經窗口離開。

「我心諗得喎」。冼婆婆坐下一會兒，但又見窗外有竹跌落，有「火屎」彈到棚網，棚網便起火，馬上倒水淋濕。後來她知道，之前颱風吹倒不少棚網，「我嗰個位置（棚網）冇吹冧，個網就冇咁容易着火，（其他樓宇）補返新網，依家燒到嘅都係新網。」

她一度想爬出竹棚逃生，「因為我知道佢有個梯」，可是竹枝不斷跌下，「底下唔知有冇燒斷一啲，一陣我踩落去，冧咗落去，咪快過坐𨋢？」

打消離開念頭，冼婆婆在屋內不斷撥打 999，但因接聽親友的來電，她錯過了救援人員的電話，那是第一次獲救機會。「我接得個電話，又接唔到個消防員嘅電話，（警方）話佢搵過你，你冇人聽。」

正上班的阿 Dow 與姐姐 June，知悉大火馬上趕回家，在社區會堂等候消息。阿 Dow 報警，「我怕我媽咪冇打電話，或者其實講得唔清楚，我自己打 999，話我單位有人。」

一小時又一小時過去，阿 Dow 看到連屋苑另一端的宏仁閣都起火、棚架倒塌，警方要求現場的人後退。

她繼續致電媽媽，詢問有否接到消防員來電，冼婆婆的回應讓她生氣不已：「我好似 miss 咗佢 call」。阿 Dow 說「你唔好同其他人講電話，收線啦」。媽媽反駁：「咁你又打電話畀我？」

兩母女說起此段情節，哭笑不得。當日氣氛可沒那麼輕鬆。

阿 Dow 突然收到媽媽來電，「佢話唔得喇，我上面漏水，我聽到隔嚟燒到啪啪聲，幅牆有裂紋，快啲叫人嚟救我。」兩姊妹擔心不已、想像媽媽千鈞一髮，趕忙向現場的警員查問，連經過取水的消防員也不放過。

「我家姐衝過嚟同我講，媽咪電話唔響、打唔通，我冇咩可以做，我只可以打電話。」

檻過「大公仔」

不知等了多久，冼婆婆才聯絡到警方，警員安慰她：「你慢慢嚟、唔好心急，講清楚你層數同座數，我哋知道宏福苑燒得好犀利，我好快搵人嚟救你。」

不久，冼婆婆聽到門外有消防員呼喊，她不敢開門，唯有大力捶門回應。

「得喇，我知道你喺邊，依家可以開門。」

一打開門，4 個消防員立即為冼婆婆戴面罩。她說對方望入屋內，「問我點解呢間屋冇煙」，聽畢冼婆婆的自保方法，「4 個手指公對住我」。她笑笑，「好悲傷裡面有個樂趣」。

跟隨消防員踏出走廊，冼婆婆形容「伸手不見五指」，但經過一個單位，從火光看到大門燒穿一個洞、還在燃燒。消防員帶她行落樓梯，問她「得唔得」，她回答：「我要生存，唔得都要得」。

「一個拖住我，一個喺後面秤住我」，又提醒她，12 樓有個「大公仔」。

「嗱，婆婆，嗰個大公仔阻住你，你檻過佢喇，唔使驚。」

「我話我唔驚，我知道係咩。」

最令冼婆婆印象深刻，是後方兩個消防員帶走那具遺體，「我當時好激動，我覺得佢真係好專業，雖然呢個係死咗，但早啲畀佢離開災場，佢家人冇咁難堪，佢顧及到呢啲，所以好值得尊敬。」

一級一級樓梯走下去，冼婆婆感到很辛苦，跟消防員說：「你哋同我報吓樓層，當鼓勵我」。消防員聞言：「得，十、九、八⋯⋯婆婆我哋到喇！」

兩名女兒心急如焚，直至收到媽媽送院的消息才放下心頭大石，「佢係去瑪嘉烈醫院，唔係重傷。」

「幸運」

決定去或留、門縫封不封、開窗還是關窗、接聽或錯過消防員的來電——火場內每一個抉擇，都是生死的轉折點。

「我知道濃煙就係第一個可以殺死我嘅嘢，火燭燒死嘅人唔多，焗死嘅人好多，呢件事我知」。與死神擦肩而過，冼婆婆說：「其實我自己都係用僅有嘅知識去應付。」

阿 Dow 心有餘悸，她眼中的媽媽，不太會照顧自己，「如果佢嗰個濃煙驅唔散，我媽咪嗰陣應該係走唔到。」

她說，媽媽當時「好醒」，但形容其自救方法是特殊、「不合理」，「其實講緊（火警）你要閂好晒啲門窗，封好晒啲地方，佢就開晒屋企嘅窗、風扇、抽油煙機，有咩抽得出去門口嘅，佢都開晒。」

「我哋好彩係風向吹唔到我哋，好彩係我阿媽堅持要買呢個（單位大門）防火門，因為我哋裝修嘅時候，我哋一定要有合規格嘅防火門。我阿媽有啲嘢嘅堅持，令到我哋今日，成為呢個好彩，我哋先救返一命。」

「點解係我哋承受？」

火災後，冼婆婆和阿 Dow 暫住 June 的家，惟地方不夠用，兩母女準備入住過渡性房屋﹐早前為了領取大維修全額資助支票一事頻撲，一時被指填漏資料，一時被要求業主親自到場。

在日常上班、火災善後之間穿梭，阿 Dow 感嘆：「我哋講真一句，冇殺人放火，冇作奸犯科，係唔係應該我哋要受呢啲嘢呢？我都想問呢個點解。」

「其實喺呢件事上面，我哋好多疑問，明知已經發生咗呢件事，點解政府唔考慮開一個 meeting 畀我哋嘅業主，正正式式全部人可以去，大家知道你嘅方向係乜嘢？」

那個災後的星期日，死亡人數還未有大概，但大批香港人自發往災場附近獻花。阿 Dow 說目睹人龍排到去太和，深受感動，感謝社會的有心人幫助。

「我覺得成個香港都被震動，呢件事正正提醒香港人同香港政府，其實我哋太安逸，我哋太容易以為自己好容易過，但原來嗰個火，就係可以咁無情⋯⋯特別香港政府喺監管上面，更加需要提醒自己，佢哋係有幾大責任，去幫助我哋呢啲無助嘅市民。」

早前冼婆婆與女兒去指示會議旁聽，也想向獨委會提供資料。阿 Dow 笑說填寫那張表格如同寫論文，最後因太忙只寫到一半，姐姐、媽媽則有提供資訊和經歷。

聽證會即將展開，冼婆婆說：「其實我哋有責任要去聽」，但認為轉播畫面不清楚，「如果再係好似上次咁樣，對住個電視，仲要側面對住我，咁細個 mon 睇唔到啲乜嘢，咁我就唔去。」

阿 Dow 則關注，聽證會沒實質法律效力，「如果個 result 出嚟，可能係話我哋個維修，要有人負責任，其實最終都要拋返個波去法律嗰度、去做訴訟。其實聽證會裡面，佢冇聽我哋任何一個業主嘅聲音，其實呢個聽證會，我哋去，亦都唔知可以做乜嘢。」

一家人能屈能伸

與記者相約在農曆新年前訪問，冼婆婆說不打算買花、買桔佈置，「唔使買一啲要浪費金錢嘅嘢，擺得幾日就拎去扔，留返我買個大家樂快餐好過。」阿 Dow 說，會照樣跟相熟親戚拜年、報平安，但不想讓親友到訪她們暫住的地方，「叫佢哋企喺度咩唔通？」

面對未來，要節儉、見步行步，她們說原址安置仍是一家人的希望。

冼婆婆住在宏福苑 40 年、有深厚感情，加上要在大埔附近覆診，原址安置對她而言是最好的安排。

阿 Dow 說：「你話（樓宇）內傷，咁你畀我返去睇吓，我哋實際環境係點樣⋯⋯你話安全問題、有冇𨋢搭呢啲嘢，我理解，但唔可以我哋唔知個情況，而要去決定我哋間屋嘅去留，呢個係唔合理。」

冼婆婆花一生積蓄買下的家園被燒毀，現時只能暫住百多呎的單位，廁所、廚房、雙層床，還未正式入伙，地上放着行李箱，床頭則擺放未開封的電飯煲。

她貫徹樂觀、知足個性，「呢度幾窄都好，出面都有個廣場可以唞吓氣吖，譬如做吓晨運都得，或者出去行幾個框，等我膝頭哥個機能仲可以健康啲。」

最重要的是，一家人還在。「我呢啲細蚊仔（女兒），真係可以能屈能伸，佢哋從好苦嘅地方出身，我哋住天台木屋，佢哋行五層樓梯上去，仲要幫我做生意，我賣生果，買七八十箱西瓜返嚟，就係呢幾個細蚊仔幫我搬，佢哋都係咁樣捱出嚟嘅人，好吃得苦嘅人。」

「我知道佢哋可以喺呢個過渡時期，唔會有怨言，佢哋有棲身之所就好。」

《法庭線》報道全部免費開放，有賴讀者訂閱支持營運：
https://bit.ly/3LJeOzX
追蹤《法庭線》網站及各平台：
https://linktr.ee/thewitnesshk