2025年我最喜歡的十首廣東歌
2025係一言難盡嘅一年，相信大家都有唔少感受，幸好依舊有廣東歌陪伴，一齊渡過艱難嘅時刻。
一如既往，喺眾多作品中，揀咗十首我最喜歡嘅歌曲。每個單位只有一首，純粹個人喜好，絕對主觀，排名不分先後。
「我尚在如此 不知醜 唱著別離開我 失去你 唯有等歌迷去 喜歡我」《用背脊唱情歌》Gareth T
人面對失去，難免想隱藏情緒，同時又好需要抒發自己嘅傷感，唯有背對觀眾，以歌詞袒露內心。世事確實無咁多如果，我地無法改變失去嘅事實，但可以憑歌寄意，盡情流露淒楚。最尾一段將歌曲情緒昇華，一個令山轉實在扣人心弦。
「離去之後 未來荊棘讓我孤身對抗 請刪掉我 不要回望 其實我轉身一剎 情緒先開始釋放」《說謊者》MC張天賦
有時即使仍然愛對方，但知道彼此無法走下去，都要忍痛放手，無奈地向愛人說謊。盼望你能找到一個更好歸宿，徹底忘記我，原諒我要用離開嚟表達對你嘅愛，分開嘅苦讓我獨自承受就好。《說謊者》旋律同歌詞非常入腦，揪心至極，年度歌曲當之無愧。
「生命意義變成 佇候你的吻天命說 共你要 攜手等 雪染白髮鬢」《給千億顆星選中的二人》Ian 陳卓賢
在遇上你以前，我對前路充滿懷疑，係你將我從孤獨與黑暗中拯救。任世界多困難，只要你在身旁，總能為我帶來溫暖，原來幸福可以如此簡單。或者係命中注定我地能遇見，就讓依段緣份走到永遠。Ian同hellosss亦一樣，以音樂連繫彼此，互相陪伴，永不改變。
「仰望晚空 月色可蘊藏絮片 曾話到嘴邊 相反已循風吹 到月耳」《我看見今晚的月色很美，你呢？》晚安莉莉
夜闌人靜時，腦海往往會無法控制思念，浮起一個朝思暮想嘅人。很想跟你說句再見，但依句再見代表離別或是重遇，我無法知道，亦害怕開口。唯有用最含蓄嘅方法向你表達：我看見今晚的月色很美，你呢？希望你能得知我嘅心意。歌詞美麗又有畫面，配上晚安莉莉嘅band sound、Sinnie富力量嘅聲線，將作品嘅情感直接唱進內心。
「想知我們如在櫻花都散落時 又會否剛好的鍾意 待你寫上我們的詩 如可以」《四月物語》林家謙
年輕時初次心動嘅場景，當時嘅一事一物，以致溫度同氣味，總令人異常深刻，可惜依份情往往無疾而終，依個或者就係青春曖昧之珍貴。四月係愛情美好嘅開始，同時係無奈嘅終結，縱然留有遺憾，但至少回憶可以長存心中。家謙久違嘅情歌，唱出一份既甜又悲嘅情感。
「我仍何以 未痊癒心驚膽顫 潛伏記憶能否遏止 隱患和我在僵持」《會痊癒的 PTSD》Jace陳凱詠
當一段情完結，總要經過艱辛嘅move on旅程，花盡力氣先能夠走出陰霾。然而，正當我地以為傷口已經消失，但留下嘅恐懼其實仍藏在內心。明明我咁辛苦先可以離開你，點解仍然要被往事纏繞？愛得多深，傷得多痛。我地無法改變過去，但可以嘗試同依份PTSD共處，有情緒時就好好抒發，終有一日你會無意中發現自己已經痊癒。
「這章節 現在未如意 繼續去寫 要一直試 就像昨天 收放自如」《年輕小說家》 Pandora
年少時即使面對挫折，我地總會一往無前，多困難都願意再接再厲。然而，好似去到某個年紀，內心會逐漸產生各種顧慮，害怕犯錯與受傷，嘗試任何新事物都舉步維艱。說到底我地只係差一份勇氣，記住青春時間有限，一去不返。即管放膽寫下屬於自己嘅故事，內容係點並唔重要，最緊要無悔。就做你吧，人生無下次！
「忘掉了的那份悸動記憶再生 讓最美好年華緊閉合眼封印」《記憶倒行》Jer 柳應廷
一段刻骨銘心嘅關係走到盡頭後，正當你以為回憶會被時間塵封，佢卻會喺意想不到嘅時候浮現。一下子讓你重回當時嘅環境，曾經嘅至愛彷彿仍在身旁，片段如走馬燈般略過，縱然感受已被歲月沖淡了一點，但記憶中嘅感覺仍舊悸動，仍然會開心，會揪心。柳應廷嘅作品就係有份感染力，讓你沉醉於歌中故事，同喜同悲。
「借我力量 夠我敢伸手給你抱 放棄包袱 活下去讓彼此互補」《求救的勇氣》 陳蕾
隨年歲漸長，當面對負面情緒，我地已經太習慣深藏，生怕別人知道自己嘅軟弱，生怕他人嘅目光，生怕不被理解。明明簡單道出一句就可以得救，但都情願獨力裝作堅強，一直內耗，令自己越陷越深。蕾子以歌聲提醒大家，只要你有求救嘅勇氣，就會有人替你分憂，緊記任何難關定會有出口。
「晴空都記起 我總喜歡你 舊地長留曖昧的某種美 回憶可以儲起 延續那滋味 I’ll remember and miss you in my ways」《miss you in my ways》 Nancy Kwai
晴空萬里，心情放鬆時，你又會唔會諗起一個曾經走近卻無法走遠嘅人？縱然彼此有遺憾，但我記得嘅只有美好片段，每次回想依然會暗暗歡喜。一切經歷都會留喺我嘅回憶中，你無法奪走，讓傷痛留在當時，快樂長留我心，用時間默默紀念依段情，默默紀念你。
縱然我地帶住傷感進入2026，慶幸仍然有歌曲讓我們梳理情緒。新一年要繼續聽多啲廣東歌！
留言推介多十首我同樣喜歡嘅遺珠作品，希望大家鐘意🫶
▼Follow hkpopculturelover
Instagram: https://www.instagram.com/hkpopculturelover/