馬拉松與人：Andy 首爾馬拉松

2024-2025 賽季
台北半馬 1:25:58（PB）/ 渣打馬 3:02:32 / 首爾馬 2:57:52（PB）24/25賽季圓滿結束😅
年頭踢波整到隻腳一路都未好返，好彩唔太影響到跑步，去到年中，開始亂嚟，諗住加大里數可以進步，七月八月香港最熱嘅時候每個月，都跑差唔多400k up，點知去到中興杯直接收皮，身體應付唔到，跑得好差，之後身體一路都覺得好攰。試過喺沙田跑長課，跑到去大王爺廟冇力，個身又冇帶八達通，要由大王爺廟行返去運動場。
所以話大部份跑手最大嘅問題都係個腦，總係會做埋啲唔應該做嘅嘢🤷🏻‍♂️ 慶幸嘅係冇受傷，只係身體要啲時間找數。

休息過後重新出發，12月台北半馬嘗試123，睇吓自己可唔可以做到4’00/k 完成半馬先再部署全馬應該要跑咩時間，結果跑126左右。雖然做唔到123，但係覺得自己狀態係fit嘅，不如報多一隻馬，咁啱首爾馬又開返，所以報埋首爾，渣馬目標sub3，試吓首爾PB。（本身今年淨係報咗台北半馬同埋渣馬）

到2月渣馬，比賽之前嗰個月病到七彩，我諗當時我識嘅跑友十個有九個都病。而家諗返我覺得個病最大影響嘅係心態，覺得自己病，俾咗好多藉口自己。其實落到場天氣熱又好，凍又好，落雨又好，病又好，傷又好，抽筋都好，冇藉口㗎。去到最尾究竟你有冇盡力跑，你自己最清楚。

渣馬302，跑得好差，冇認真去跑，諗住sub3過，心存僥倖，睇少咗渣馬，睇少咗馬拉松，睇高咗自己。跑完好唔開心，嗰晚有喊，點解自己咁唔爭氣呢？點解自己咁容易放棄呢？

跑完渣馬，我同教練傾番，佢俾我嘅意見就係：渣馬又係衰返以前嗰樣嘢，開快咗，追時間。嚟緊首爾記住「你唔係去首爾玩，你唔係去首爾行」。呢個信念一路撐住我，直至到我跑完首爾。
坦白講渣馬之後嗰個月嘅訓練對自己冇晒信心，但係同自己講一定要完成，90分鐘加速跑頂埋佢，3隻5K頂埋佢，36K長課頂埋佢，嗰個禮拜真係好辛苦，慶幸有Marcus同我一齊練。

之後去到首爾，心裏面只係得一個信念，「我唔係嚟首爾行路㗎，我係嚟首爾PB㗎，我係一定要做到㗎！」
冇藉口，冇口術，冇盡力，冇嘗試，冇天氣惡劣，只有一樣嘢，就係做到嘅決心。
最後2:57:51，Official 2:57:52 我係好開心㗎，起碼對得住自己，同上年比，只係快咗6秒，唔係咩好嘅成績，
話就話PB，其實即係冇進步但係，起碼贏返渣馬嘅自己，呢樣嘢對我嚟講好緊要。

嚟緊只會係得一個目標，10k 要跑到37👊🏽，由低做起，從頭再嚟過。講埋出嚟，唔想俾後路自己，唔好再有啲乜嘢藉口，乜嘢嘗試呀、盡力嗰啲，一定要有一定要做到嘅決心，做唔到就練（7）再練（再7）😅。
2025-2026加油❤️‍🔥

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/