許軼零距離接觸粉絲獻出多個第一次 預告好快推出下首solo歌
COLLAR成員許軼（Day）日前推出首支個人單曲《Wait A Second》，首度「單飛」的Day為隆重其事，昨日（19日）特意舉行「Wait A Second with Daypa」活動，邀請數十位粉絲一同DIY親手設計限量版Daypa 公仔，首次與粉絲零距離接觸，Day自言心情緊張又興奮，更表示下一首歌的Demo已出，呼籲粉絲們要密切期待！
《Wait A Second》對Day來說意義重大，歌曲為她帶來個的「第一次」，舉行「Wait A Second with Daypa」活動，也是Day第一次與粉絲一起DIY設計Daypa 公仔。「因為第一次出歌，加埋呢段時間有公仔潮，於是公司同事就諗可以舉辦一個活動，俾粉絲同我設計屬於自己嘅應援公仔，而呢個公仔就叫做Daypa，雖然有好多Fans Club都有佢哋嘅應援公仔，但今次好特別，係配合埋首歌。」
首次與粉絲零距離接觸，Day坦言心情緊張：「之前COLLAR簽名會，都會同粉絲握手、簽名，但就未試過同Fans參加workshop，好似朋友咁DIY公仔，感覺再Close啲，有緊張感覺。」談到DIY公仔，Day自言有選擇困難症，製作公仔上需時較長。「我喜歡DIY手作，但就唔擅長，加上我有選擇困難，整呢隻公仔，我都用咗2﹑3個鐘頭，我見Fans佢哋整得靚過我好多。」
活動期間，Day發現粉絲年齡層廣泛，當中有「長者級」粉絲，大叫感動：「有一半以上粉絲都係因為睇《全民造星》而開始鍾意我哋，好感動佢哋一直支持，今次活動，有一種可以送番份禮物畀佢哋嘅感覺。」
提到《Wait A Second》MV首播當日，COLLAR一眾成員一同觀看，未知各成員對於其新歌MV可有評價？Day說：「當時大家一齊排舞，休息時就一齊睇MV放鬆，我同佢哋講『我個MV有男主角』，佢哋個個都好驚訝，因為佢哋知我勁怕醜，見到我喺MV入面故作鎮定，佢哋覺得好搞笑。」
《Wait A Second》播出以來在網上觀看人數已逾60萬，Day笑言不滿意：「講笑啫，冇話滿唔滿意，好開心大家鍾意首歌，之後我都會繼續出歌，下一首已經有Demo，至於風格係點，大家期待一下！」