點止香料咁簡單　十個你不知道的丁香功效

丁香係丁香樹幹燥後嘅花蕾或果實，亦都係好受歡迎嘅香料之一，唔少食物都會加丁香烹調，例如燉肉等等，其實丁香仲有好多功效㗎。

1. 強化免疫系統

丁香含有豐富維他命C，增強抵抗力，每日服用可以增加體內白血球數量，降低被細菌感染嘅機會。

2. 舒緩牙痛

丁香一個最特別嘅用途就係用作麻醉劑！當你牙痛難耐，可以放一粒丁香喺患處咬實，痛楚就會慢慢舒緩，而且丁香可以有效控制口腔病原體嘅生長，減少口腔疾病。

3. 提升肝臟效能

肝臟主要負責分解身體毒性達至排毒效能，而丁香內嘅丁香酚就好似強化劑咁，協助肝臟更有效排毒及代謝。

4. 骨骼關節好幫手

丁香同骨骼有乜關係？其實丁香所含嘅丁香酚及錳、黃酮、異黃酮、類黃酮等等提取物對保護骨密度同骨礦物質含量好有幫助，能增加骨骼嘅抗拉強度，將健康礦物質送到每一支骨上。

5. 含有抗菌成份

阿根廷有大學就丁香進行研究，測試丁香抗菌能力，結果顯示丁香內嘅丁香油有效擊退大腸桿菌及葡萄球菌，更有漱口水加入丁香，研究發現呢類天然漱口水能促進牙肉健康及有效清除口腔細菌㖭。

6. 含有豐富抗氧化物

丁香係攝取多酚最強大嘅來源，平時使用植物會吸收到多酚呢類微元素，微元素幫助降低膽固醇及血壓，提升動脈功能及彈性，減肥人士都好需要多酚㗎！

7. 幫助調節血糖水平

丁香好似身體嘅胰島素，幫助排出血液內多餘糖分，調節血糖水平，所以糖尿病人士服用丁香會有顯著功效！

8. 幫助消化

由於丁香可以刺激腸道消化酵素嘅分泌，能夠有效改善消化問題，亦可以減少噁心情況。服用丁香粉可以幫助消化及避免便秘，去唔到廁所嘅人士可以考慮。

9. 舒緩血液凝固

丁香酚另一功效係減慢血液凝固速度，避免血管栓塞情況，不過本身有薄血情況嘅人就唔太適合服用丁香。記得諮詢醫生意見，唔好傻傻的亂服呀。

10. 舒緩炎症

丁香具有抗炎同止痛特性，而丁香酚可以通過刺激疼痛受體減輕痛楚，對治療頭痛都好有效。患者可以考慮內用或外敷：將丁香浸喺椰子油中再用丁香於疼痛位置按摩。

始終丁香都係藥材嘅一種，應該注意服食數量，過量可能會有反效果，有疑問應該尋求專業意見。

撰文：沙拉