宏福苑重置｜災民實況　萬元呎價收購　要蝕百萬離場　不滿扼殺原址重建　「憑咩幫我決定？」

政府在周六大年初五，公布宏福苑重置方案，收購呎價「提高」到八千至一萬元，宏志閣居民暫被撇下「收購列車」，政府並向原址重建說不。一班力爭原址重建的災民看在眼裏，不滿官員說好的「按喜好選擇」被扼殺，感覺「似夾硬要我哋食啲唔係我想食嘅餸」。
一萬元呎價背後，有業主以自己約 530 萬元的物業分析指，若接受收購，只能收到約 469 萬元，埋單計數要蝕百多萬；若接受樓換樓，一來沒鍾情單位，換市區樓必然是「大屋換細屋」。對於政府以十年太長為由封殺原址重建，居民反問高官，「等嗰個唔係佢，憑咩幫我決定？」有居民苦笑說：「亞洲式家長管教係咁㗎啦」。
宏志閣居民像墮入「收購孤島」，有居民擔心，這或許是政府的援兵之計，憂回家入住一兩年後，或會被政府以強拍、土收等招數踢走。

萬元呎價收購　業主要蝕百萬離場

政府的重置方案，收購價較早前問卷的意向價 6000 元及 8000 元有所提高，未補地價單位呎價 8000元、已補地價單位 10,500 元。一心想原址重建的居民張先生說，從沒考慮過政府的收購價，出價不是他的考慮範圍。「如要好公道的評論價錢，說夠或不夠，好容易會落入給人說貪心」。

記者問他如何評論收購及樓換樓方案的細節？張先生說出多個疑問：「樓換樓，抽籤、排隊係點？政府話六月簽約優先揀樓，你係咪想我哋啲居民再一次內鬥？邊個快啲搶到先？你係咪想再分裂我哋呢？」他續說：「如到我揀樓時，剩返 200 幾呎的單位，我係咪 500 多萬供咗個 200 多呎地方？我係咪不如銀主盤算？仲供乜嘢呀？」

寧做銀主盤保住積蓄　或會離開香港

張先生的向海單位，面積 447呎、已補地價，當年以 530 萬元買入。他表示，若以政府的出價，呎價 10,500 元計算，會以約 469 萬元被收價，「咁我仲要倒蝕百多萬，仲要再去供一個我未必喜歡嘅地方。唔好同我講乜嘢，你𠵱家搬出市區，新樓換舊樓梗係正啦。我嗰時買樓，我係有得揀我想住市區定郊區，我想住新樓定舊樓，我鍾意宏福苑個則、個地段，座向、景觀我先買㗎，我剩係想要返我想要嘅嘢」。

張先生說，看到有關收購方案，未來或會離開香港，重新開始。「我答應咗要賠多百多萬，你賠唔賠？如果我𠵱家銀主盤，我唔使賠多百多萬；如我換樓，我要賠多百多萬去換單位；如果我接受收購，我收 400 多萬要畀返銀行，但係我乜都冇，我係咪應銀主盤，我保住我自己儲蓄？」

「夾硬要我食啲唔係我想食嘅餸囉」

看了有關重置方案的記者會後，街坊阿恩（化名）認為，政府看來似想快點完事，而非想協助災民解決困境。「話有 3900 個（樓換樓）單位，𠵱家問題唔係單位數目，而係你提供出嚟嘅，係咪切合我需要，如果唔切合我需要，你多啲（單位）都冇用啦」。她續說：「對於我嚟講，兩樣嘢（取錢買私樓、樓換樓）都唔係我想要，你話有好多選擇畀我，咁究竟你畀咗啲乜嘢選擇我？你好似夾硬要我食啲唔係我想食嘅餸囉」。

「佢憑咩幫我哋決定」

關於原址重建，財政司副司長黃緯倫表示，估計需時十年，「一個這麼長的等待，如係另一地方生活咗九至十年，會唔會係第二個地方感情聯繫已建立咗，政府最終沒原址重建這選項」。

對於黃偉綸的想法，張先生回應說：「我覺得唔到佢考慮囉。佢憑咩幫我哋決定，𠵱家係佢畀火燒咩？佢唔係喎，我係死裏逃生嗰個，晚晚發惡夢見到火災嗰個喎。」他表示，有失去親人的街坊都表示想回宏福苑，重申「佢憑咩幫我哋決定？」

張先生續說：「等係我哋等，受苦係我哋受，副司長話覺得唔合適，我想捱，你都唔畀我捱！」聽到這裏，阿恩回應張先生自嘲說：「亞洲式家長管教係咁㗎啦，老豆老母話唔啱你就唔啱你」。張先生不忘反駁：「呢樣嘢我畀錢買喎」。

「係咪應向國家偷吓師？」

黃緯倫說，在另一地方住九至十年，也會產生感情連繫，張先生反駁：「我係度住咗 30 年，30 年同九至十年，你覺得邊個耐啲？」他續說，居民第一次聯署時，政府曾回覆收到聯署，「嗰度有 394 戶同我哋講，就算等十年都會等，佢係知道呢個答案。佢攞初步問卷講，只有 9 %人堅持原址重建，大佬，你問我初步，你剩係抽你想講嘅答案，你話公唔公道？」

他建議官員落區跟居民一起商討。他指若只有近 400 呎希望原址重建，政府只要建兩座就可。他指出，在上海的原址重建，只需四年就可拆 40 幢、建 17 幢，「係咪應向國家偷吓師？」張先生表示，仍未放棄，表示將會再據理力爭。

「覺得好似畀佢呃咗，用一份問卷一錘定音」

關於原址重建，阿恩表示，最大問題不是要等多少年，而是「無得揀」。她說：「你講過話一定會有唔同方案，貼切大家需要，當時大家覺得呢個政府好開明，好理解我哋心情，跟住做問卷，覺得啲問題好似有啲誘導性，今日記者會講嘅嘢，好似引用返問卷數據，我哋覺得好似畀佢呃咗，用一份問卷一錘定音」。

阿恩說：「你一開始講有唔同方案畀大家揀，但點解到最後，好似得返收購業權呢一樣嘢？」對於等九至十年是否太長，阿恩也想回應：「街坊話齋，等嘅唔係你，係我，你理得我覺得辛唔辛苦，個問題係你冇得畀我揀等唔等呀，唔係我要等幾耐。你有得畀我揀，我咪去分析利弊，再做決定囉，但你𠵱家連揀都冇得畀我揀，有啲霸道，剩係得返收購業權」。

「9%都係人嚟㗎」

對於爭取原址重建的訴求，她表示，早前跟政府表達、找議員幫忙跟政府說心聲、找不同的街坊向傳媒訴心聲，可做的已做了，「點解今日記者會出到嚟，得返收購業權一種聲音？」政府表示有 9% 居民堅持原址重建，阿恩說：「就算得 9%，你都要畀人揀，而唔係因為少而唔做，呢個係唔合理」。「 9%都係人嚟㗎，都有需要，你唔可以因為少就唔做，呢個唔合理」。

「以佢做少幾多嘢為先」

張先生說，若香港政府想跟隨國家步伐，以人民為先，「咁佢𠵱家唔係做緊呢樣嘢，以佢哋自己份工為先，佢以佢做少幾多嘢為先」。「我哋十多萬請呢啲人返來，係同國家個方向背道而馳」。

「仲起乜嘢公園」

政府說不會將宏福苑原址重建或作住宅發展用途，而是轉作公園，或社區設施。張先生說：「我覺得最白痴係，本身個地方係住人，有人想返去住。我本身就住開嗰度，係燒咗，我冇咗個地方，我想住返入去」。「起公園？喂，你啲政府官員落咗行吓啦，兩步就元州仔公園，再過條橋，就海濱啦，對面馬路連狗公園都有，仲有足球場，仲起乜嘢公園？」

他們指，政府有責任為今次事件作出補救。張先生說，「係你睇漏就係你睇漏，你唔好講到你完全冇責任」。他續說：「我哋唔係完全懶理呢單嘢，物料唔合格，發泡膠，拍晒片㗎啦，揾哂你，你話ok，揾哂 ICAC，你都話冇問題。出咗事，就即刻捉法團去查，點解之前話證據不足，𠵱家著咗火就有證據呢，發生乜嘢事呢？係咪你政府有疏忽，令到佢著火呢？係絕對有囉」。阿恩說：「（房屋局）ICU、ICAC、屋宇署、市建、消防、民政、勞工處，呢啲全部揾過哂」，「我哋有交稅，你話要大維修，我哋跟從你驗樓令，出咗事，冇人幫我哋，政府點解唔係喺我哋立場去諗，而係想快快了事就算，想走人 bye bye 咁？」。

宏志閣成「孤島」　居民憂一兩年後會被踢走

今次的收購，宏志閣的居民未能「參與」。黃緯倫指，由於宏志閣仍然是可供居住，政府必須尊重私有產權。黃緯倫在記者會被問及，如宏志閣居民最後談妥，而政府介入，要多用多少錢？黃緯倫表示，如果七幢樓需用 68億，一幢樓就需要九億多，認為需要視乎進一步的情況為何。
一直協助居民爭取原址重建的宏志閣居民戴先生表示，自己無論是回家居住，或是原址重建都可。「支持原址重建，係想等居民齊心，齊上齊落」。宏志閣在未來或成「孤島」，戴先生表示，居民的憂慮包括屋苑的管理費，日後是否由宏志閣居民支付？中期而言，他也擔心一兩年後，會否面臨被收樓，「你畀完希望我，你過兩年話唔得，都係收你，我哋心理陰影更加大」，「好驚一樣嘢，你畀我返去，跟住你收完嗰七座，然後轉頭要踢我走，你強拍又好，土收又好踢我走，剩返啲住戶就孤立無援」。這段日子，居民有就原址重建的訴求，求助區議員、議員，張先生說，有議員不方便轉達意見。戴先生說，有街坊近日告訴區議員想去靜坐拉橫額，街坊其後收到重案組探員來電關注。

宏昌閣業主李先生不滿，政府未有交代保險、餘下維修費等如何處理，以及若不賣業權會如何處理，「我唔賣畀政府，佢係咪強拆我層樓？」。他又指，「保險我哋畀錢買嘅，大維修我哋真金白銀畀嘅，屋苑嘅盈餘又係我哋畀錢嘅」，但憂政府收購業權後，業主不能取得相關賠償，「你個政府而家全部攞曬」。

李先生批評，政府起初說是收集初步意見，現時又以此作方案的最終決定，是誤導居民。就政府稱若 8 月 31 日前未決定，便不會享相關安排，他質疑調查委員會尚未有結果，「就逼我哋做個決定」。有聲音質疑政府用公帑買業權，他則指政府使用的公帑，是用來買宏福苑這片土地，日後可有回報，「用咗嘅公帑遲啲係收得返」；雖然政府現時稱不會建造住宅，但日後的事難以預料，「到時佢落台，唔關佢事啦」。他指，現時會觀察其他人的意向，暫不會作選擇，認為至少要等委員會有決定，才可看下一步如何走。

年長父母盼原區安置　惟收購價不足以購同面積居屋

宏盛閣居民 Candy 同樣不接受方案，指政府「成日用份問卷嚟撻我哋」，回答許多假設性問題，「咁就定個方案出嚟要我哋揀，公平嗎？合理嗎？畀我感覺想草草了事。」Candy 一家五口居於 431 呎單位，是宏福苑第一代住戶，父母原希望原址重建，但因政府稱需時十年，迫於無奈才沒有選擇。她指父母年紀已長，難以適應其他區生活，堅持原區安置，望能短期內在大埔買到相同呎數的居屋，惟以未補地價的 8,000 元呎價計算，只可買到同區約 340 至 380 呎居屋、還要補差價；她亦不接受頌雅路西的方案，指該處為山墳、交通亦不方便。

Candy 指，若出售業權予政府，或未能取得原有保險賠償、大維修後備金、餘下維修費等，質疑為何宏福苑帳目未計算好就急於賣業權，「業主們追唔番可以取回嘅錢」。有聲音質疑居民用公帑、貪心等，她指政府在今次起火責無旁貸，「個個真金白銀買，政府監管不力，邊個責任？何況部分係用善款…」

Candy 現時擔憂，若兩年後未安頓好，還會否有租金津貼，亦指合安接管後至今未有交代，或安排與居民會面，難以令居民安心。她指收購一向以同區七年樓齡來計算價格，望政府確保收購價讓業主至少能在大埔區購買相同面積的居屋；又指仍有很多疑問，認為政府應公開解答居民疑慮。

憂分化宏志居民、指政府仍未承擔責任

在火災中收去雙親、居於宏志閣的蘇先生，希望返回宏志居住，但認為政府應清楚交代維修及管理費等後續如何處理，以及賣業權後是否無法追究火險賠償等。他指，政府現時安排令宏志居民處於兩難局面，因若逾半業主同意收購，便可納入計劃內，會造成居民間嚴重分化；而現時很多宏志街坊都表示要看清楚再做決定，因有很多不明確因素，部分老人家則想快點換樓，換得安身之所。

蘇先生又指，政府現時用熱心市民的資助收購業權，即「用緊居民嘅錢收購返居民嘅業權」，但最終若賣地，利益就歸政府，如「食兩家茶禮」。他又指，災民失去的不止是一層樓，還有家中很多寶貴財物和回憶，最重要是失去家人，「怎樣賠也賠不返家人俾我！」，但此事上政府從未承擔過任何責任，「唔通可以當無事發生咩？」

歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/